Henry Birgir kann að telja

Samkeppni er til góða. Henry Birgir Gunnarsson íþróttafréttamaður á Fréttablaðinu er duglegur að bloga/blogga og er hann yfir sig undrandi á því hve margir heimsækja bullið hans. Hann fékk um 400 heimsóknir áður en hann stofnaði bullið og yfir 1000 á fyrsta degi. Hólí krapp hvað búa eiginlega margir á Húsavík?

 

Henry kann að telja, ég hef séð það sjálfur. Hann er ekki viss um að Vísisteljarinn kunni að telja.

 

Talandi um talningu þá tel ég að það styttist í að faðir minn komi í 10.000 sinn inn á þetta bullsvæði mitt. Hann er sá eini sem veit af þessu og þar sem hann er hættur að vinna þá gerir hann lítið annað en að hanga inni á seth.blog.is og hlusta á útvarp Sögu.

Hér á eftir er færsla Henrys um talninguna á Vísi.  

Kemst ekki hjá því að minnast á þennan dýnamíska teljara sem fylgir síðunni. Þegar ég var að lemja þessa síðu saman í gærkvöldi, og hvergi kom fram að þessi síða væri til, þá voru heimsóknir þegar komnar í 400. Er það alveg eðlilegt?

Veit að margir fá mikið út úr því að fá sem flestar heimsóknir á síðuna sína og metnaðurinn til að klifra vinsældalistann á Moggablogginu leynir sér ekki hjá fjölmörgum bloggurum sem beita ýmsum brögðum til að vekja athygli á blogginu sínu.

Svo virðist sem taktík Vísis við að fá fólk yfir til sín frá Mbl sé sú að smyrja ofan á heimsóknartölurnar. Það er mín reynsla enda ekki break að tæplega 1000 manns séu búin að skoða þetta blogg sem tíu manns vita af.

 

 

KR fáni vekur reiði á Akranesi

KR er enn að fagna Íslandsmeistaratitlinum í körfu og fögnuður þeirra nær alla leið upp á Akranes.

Málið er til umfjöllunar hjá héraðsfréttamiðlinum Skessuhorni.

Góð frétt.

Ekki margir sem hafa þorað að flagga KR-fánanum í "Slippnum" fram til þessa.

Ég veit ekki hvernig staðan er á starfsmannalistanum í Slippnum þessa dagana en þessi vinnustaður hefur í gegnum tíðina verið einn "heitasti" guli bletturinn á Akranesi. Eldheitir stuðningsmenn ÍA með logsuðutæki og slípirokka á ferð og flugi í skipasmíðastöðinni. 

Heyrði einu sinni afa minn segja frá því að einhver kjáni hafi flaggað KR-fánanum á miðjum sjötta áratug síðustu aldar í "Slippnum". 

KR-ingurinn mætti aldrei aftir í vinnuna.

Sú lygasaga gekk um bæinn að hann hafi endað með fæturna í blautri steypu í stálbala að ítölskum mafíósa sið. Sel það ekki dýrara en ég keypti það en á síðari stigum flökkusögunnar var sagt frá því að floteiginleikar og siglingahæfi stálbalans hafi ekki verið upp á það allra besta. Hann sökk eins og steinn. En þetta var að sjálfsögðu allt saman helv. lygi. 

 

"Við sáum ekki rassgat,"

KR kórinn söng með tilþrifum í úrslitakeppninni gegn Njarðvík.

Þessi frasi var oft á vörum þeirra;

"Það heyrist ekki rassgat,"
"Það heyrist ekki rassgat"
"Það heyrist ekki rassgat"
"Það heyrist ekki rassgat".

Ætla að bæta einu við þetta úr blaðamannastúkunni. 

"Við sáum ekki rassgat,"
"Við sáum ekki rassgat,"
"Við sáum ekki rassgat,"
"Við sáum ekki rassgat,"
"Við sáum ekki rassgat," 

- til hamingju KR. 

Flott úrslitakeppni og frábærir stuðningsmenn sem stóðu allir beint fyrir framan blaðamannastúkuna. Skiptir engu máli úr þessu. Allir í stuði.
 

Einar: „Körfuboltinn hefur færst upp á annað stig”

Magnús sáttur

S.l. föstudag sá ég bros á andliti blaðamanns á Blaðinu.

Hann var glaður.

Samruni.

Fjölmiðlarnir við Hádegismóa ein stór fjölskylda.

Magnús Geir Eyjólfsson, skrautfjöður Blaðsins, var þokkalega sáttur.

Hann sér fram á nýja og breytta tíma.

Hádegismatur við Hádegismóa á nýjum kjörum. 

Magnús verður aldrei svangur aftur. 

Lækkun á matvælaverði skilar sér misjafnlega

Einn maður ábyrgur

Ég trúi því að það sé aðeins einn maður

á bak við 29% aukningu H/M í mars.

Sá kann að versla mikið á stuttum tíma.

Ég rölti sjálfur um svæðið bæði á þriðjudag og miðvikudag. Keypti mikið af fötum í H&M. Kemur bara þrælmikið á óvart.

 

Mikil sala hjá H&M

Dragúldnir slagarar

Kannski er maður ekki eins gamall og maður heldur.

Unga fólkið í dag fílar gamla dragúldna slagara sem hafa farið ótal sinnum í gegnum endurvinnslu. Gamla vinyl plötusafnið er kannski einhvers virði?

RÚV er alveg að blóðmjólka framhaldsskólana í dagskrárgerðinni - spurningakeppnin í nokkrar vikur á föstudögum og síðan tekur þetta við.

Þetta lagar kannski rekstrarhallann...ódýrir skemmtikraftar.

Gaurarnir úr MH með Pink Panther eru langflottastir. 

Helga og Hera, hehehehehehe, eða þannig.

7,5 km. hjá báðum kynjum og málið er dautt

Karlar keppa í 15 km. göngu og konur í 5. km. göngu á Íslandsmótinu í Hlíðarfjalli.

Er þetta ekki gargandi ójafnrétti?

Væri ekki hægt að díla um 7,5 km. hjá báðum kynjum og málið er dautt. Að mínu mati er þetta eitt stærsta kosningamál vorsins.   

Sigurgeir fagnaði Íslandsmeistaratitli í 15 km. göngu

Byggt yfir fallhlífarstökkið

Ég veit ekki hvernig hægt er að toppa yfirbyggð knattspyrnuhús.

Jú, það mætti líka byggja yfir fallhlífarstökkið.

Börn og unglingar sem stunda fótbolta á Akranesi og víðar hafa það gott.

Tók að mér að stjórna æfingum hjá 5. fl. karla í gær í Akraneshöllinni.

Úti var grenjandi rigning og rok. Skítaveður. Strákarnir spörkuðu í boltann í 7 stiga hita í Akraneshöllinni. Logn, þurrt og frábært undirlag.

Djöfull væri maður góður í boltanum ef þessi aðstaða hefði verið til fyrir 30 árum.

Man eftir voræfingum á malarvellinum í skítakulda og haglél dundi freknóttum kinnum. Boltinn fauk út á Langasand á frosnum vellinum, kaldir puttar, köld eyru og bláar tær. Kannski varð þetta til þess að herða mannskapinn. 

Hef heyrt af því að Skagamenn ætli að verða fyrstir allra til þess að byggja yfir fallhlífarstökkið. Það væri snilld.  

Aðstoðarmaðurinn er Framsóknarmaður

Fyrir sléttu ári síðan var grasið á flötum Garðavallar á Akranesi farið að grænka og leikið var á sumarflötum í lok apríl.

Útlitið er ekki eins gott þegar litið er yfir völlinn í dag. Það er blautt og verður áfram blautt.

Helv. veðrið. eða réttara sagt. Helv. rigningin. 

Trampólínið komið út í garð - jea right- sumarið á næstu grösum.

Var að leita að einhverjum hlutum til þess að halda því á sínum stað í SV-hvassviðrinu.

Get huggað mig við það að á Mallorca er líka stundum rigning.

Er alvarlega að spá í að hætta að hlusta á íþróttaþátt VBV.

Var að fatta það að aðstoðarmaður hans, Matti, hefur svipuð áhrif á mig og Framsóknarflokkurinn. Úff...."  - Tek útvarp Sögu framyfir.     

Gott útvarp

Fékk skammir frá helsta styrktaraðila seth.blog.is fyrir gamalt stöff á þessari síðu.

Reyni að vinna úr því í snarhasti.

Hlustaði á útvarp Sögu í morgun, nauðugur, var að keyra gamla settinu í flug í Keflavík. Ekkert nýtt á ferðinni á Sögu sem er eins og ég hef sagt áður frá blogg gamla fólksins. Arnþrúður talaði við hlustendur og sumir þeirra fannst mér vera tæpir á geði og aðrir hljómuðu drukknir. Gott útvarp. 

Skipti á Rás 2 þegar ég fékk sjálfstæða hugsun á ný og þar vantaði íþróttafréttamannn í hljóðver kl 11:30 - ekkert í gangi og engar skýringar. Ohf. hvað? Upp með sokkana RÚVARAR. 

Páskahelgin var fín í sveitinni fyrir austan fjall. Ótrúleg uppskera hjá börnunum þegar gengið var þvert í gegnum golfvöllinn á Flúðum. Við fundum alls 60 golfbolta og fórum ekki á æfingasvæðið hjá Halldóri. Allir sáttir - og páskaegg nr. 7 eru of stór fyrir 5 ára gutta. MAstersmótið var að sjálfsögðu hápunktur helgarinnar - og gott fyrir golfíþróttina að Tiger Woods vann ekki - Zach Johnson???????? Hver er það?

Horfði í stutta stund í gær á formenn stjórnmálaflokkanna í gær á RÚV. Úff, ekkert sem þarf að endursýna að mínu mati. Þoli ekki þegar menn komast upp með að svara ekki spurningum. Það væri ráð að setja upp þátt sem heitir "Ég spyr eins og kjáni"  - fréttamaður og stjórnmálamaður - einn á einn...og fréttamaðurinn endurtekur spurninguna þar til að svar fæst. Svona Ali G - vinkill á þetta. 

Njarðvík - KR var meira spennandi en stjórmálin  - allavega í stutta stund.  

 

Bjór og rauðvín í Einarsbúð

Í fyrsta lagi,bla bla bla bla.... Í öðru lagi bla, bla bla, og í þriðja lagi, bla, bla, bla, bla, Jón Baldvin Hannibalssson er sá fyrsti sem vakti áhuga minn á stjórnmálum.

Hann var reffilegur kall sem talaði af sannfæringu og krafti.

Kaus hann einu sinni en það var kaupstaðarlykt af þeim kjósanda þegar sú ákvörðun var tekin - keypt atkvæði hjá 18 ára nýliða.

Það vantar svona kalla í stjórnmálin í dag. 

Steingrímur Sigfússon er stundum með svipaða takta en hann kemur í veg fyrir að ég geti keypt mér bjórkippu eða rauðvínsflösku í Einarsbúð. 

Forsjárhyggja og tóm leiðindi. Óumhverfisvænt  - gæti sparað mér ferð í Ríkið eftir búðarrápið. Er samt enn í vafa um hvað eigi að kjósa í vor.

Ég fylgdist með stjórnmálaumræðu í Noregi á árunum 1998-2000. Veit ekki afhverju, var ekki með kosningarétt, en þar var kona sem heitir Kristin Halvorsen í sjónvarpsþætti, hún er í dag fjármálaráðherra Noregs og er hún í SV,  Sosialistisk Venstreparti.

Það sem vakti athygli mína við Halvorsen var að hún talaði aldrei um það sem "hafði gerst" í stjórnartíð meirihlutans -(hún var í minnihluta).

Hún talaði bara um það sem hennar flokkur hafði fram að færa. Og hvernig þau ætluðu að koma því í verk. Punktur.

Það fannst mér áhugavert og ótrúlegt hve fáir stjórnmálamenn tala með slíkum hætti. 

Ég fæ kjánahroll  þegar stjórnmálamenn fara að ræða um að allt hafi verið í tómu tjóni árið 1989 í tíð vinstri stjórnar og svo öfugt. 

Hver man eftir svona atvikum - fólk sem hlustar á útvarp Sögu alla daga.
 

Svona svipað og að ræða um hvort það hafi verið hornspyrna eða markspyrna í bikarúrslitaleik KR og Fram árið nítjánhundruðogeitthvað. Hverjum er ekki sama?

Þetta er allt liðin tíð.

Ég vil fá að vita hvaða flokkur ætlar að koma með bjórinn og léttvínið í Einarsbúð.

Þegar þeirri rannsóknarvinnu er lokið þá mun ég kjósa þann flokk. Allt annað er aukatriði. 

 

 

 

"Hökktóttir"

Lofboltinn hjá KKÍ sem minnst var á í síðustu færslu er að sögn Friðriks Inga Rúnarssonar framkvæmdastjóra KKÍ vegna sjónvarpssamnings KKÍ og Sýnar. Meistaradeildin er í gangi þriðjudag og miðvikudag, engar beinar útsendingar því á dagskrá hjá KKÍ og fimmtudagurinn, skírdagur, því eini rökrétti dagurinn að þeirra mati.

Svo sem ágæt rök, en Friðrik sagði að það væri kannski betra í framtíðinni að leika lengur fram á vorið í úrslitakeppninni og sleppa þessu páskastússi alveg.

Ég er sammála því. Fínt að tengja saman úrslitakeppnina og upphafið á Landsbankadeildinni í fótbolta sem hefst upp úr miðjum maí.

Að öðru: Hlusta stundum á þátt VBV á X-FM, stundum góður og stundum slakur. Í gær sagði Hans Steinar Bjarnason fína setningu. Hann var að tala um fótbolta eða körfuboltalið. Man það ekki. 

"Þeir eru svo hökktóttir."  -

Loftbolti hjá KKÍ

Ég hef hrósað Körfuknattleikssambandi Íslands fyrir fréttaflutning á heimasíðu KKÍ og einnig fyrir hve vel er staðið að tölfræði og öðru slíku hjá sambandinu. Sérsamband í fremstu röð á þessu sviði.

KKÍ leikur hinsvegar illilega af sér þegar kemur að uppröðun leikja í úrslitakeppni karla nú um páskahátíðina.

Tveir oddaleikir eru á skírdag og mikil spenna í röðum þeirra liða sem þar leika.  

Ekkert verður fjallað um þá leiki í dagblöðum landsins á föstudaginn langa - þar sem að dagblöðin koma ekki út þann dag.

Úrslitaeinvígið hefst á öðrum degi páska og þá eru fréttahaukar landsins mættir til vinnu á flestum stöðum. Ég er því undrandi á því að KKÍ velur skírdag sem lokakvöld á frábærum rimmum í undanúrslitum úrslitakeppninnar.  

Leikirnir eru vissulega gott sjónvarpsefni en það er ekki næg umfjöllun. Þegar tækifæri gefst fyrir körfuknattleiksíþróttina að baða sig í sviðsljósinu án samkeppni frá öðrum greinum geigar skotið hjá forráðamönnum KKÍ.

Stundum er slíkt kallað loftbolti eða airball?

Ekið yfir blaðamann

"Keyrðu rútuna yfir hann," eða eitthvað í þá áttina sagði Steve McLaren þjálfari enska landsliðsins í rútu fyrir utan ólympíuleikvanginn í Barcelona í fyrrakvöld. Þar var á ferð breskur blaðamaður og það var eins og hrægammur hafi gengið fyrir framan enska þjálfarann. Hann horfði á blaðamanninn og bað síðan bílstjórann að keyra yfir gaurinn. Sky fréttastofan er búinn að rúlla þessu myndbroti í dag á hálftíma fresti.

Stuðningsmenn enska landsliðsins öskruðu á þjálfarann og leikmenn liðsins í hálfleik þegar staðan var 0:0 gegn Andorra - þjóð sem gæti ekki einu sinni fyllt Old Trafford ef allir íbúar landsins mættu á völlinn. Það var meira að segja sölumaður í skíðadeild og garðyrkjumaður í landsliði Andorra.

Breska pressan ætlar sér að bola McLaren í burtu og það virðist sem það sé að takast. Endalaus vandræði með þetta enska lið. Þeir gera sér ekki grein fyrir því að þeir eru bara ekki eins góðir og þeir halda.

Það hefur mikið verið fjallað um hermennina sem eru í haldi í Íran og olíuverðið hefur flogið upp eftir þetta atvik. SKY hefur varla fjallað um annað undanfarna daga.  Þar hefur aðallega verið rætt um einu konuna í hópnum og allt kapp lagt á að ná henni fyrst til Bretlands. Og helstu rökin eru þau að hún er móðir. Ég velti því fyrir mér hvort það séu ekki einhverji feður í þessum 15 manna hópi? Allt í lagi að skilja pabbana eftir  - þeir redda sér.    

Fékk að kynnast miðnæturstemningunni hjá Spánverjum á miðvikudaginn. Hverjum datt í hug að leika kl. 22 að kvöldi. Panik, læti og stressaðir spænskir blaðamenn sem berjast við að lemja inn efni í fartölvurnar fyrir sín blöð. Þetta er ótrúlegt kerfi og ekki til eftirbreytni.

Mallorca er annars fín, Palma kemur á óvart, fallegur bær, en veðrið maður, veðrið. Þetta er náttúrulega bara fyndið. Það rigndi eins og hellt væri úr fötu á leiknum á miðvikudaginn og það rignir enn. Fór því lítið fyrir því að skoða bæinn og nánasta umhverfið. Lærði nýtt orð i ferðinni. Mohito. 

Lampard reiknar með að spila gegn Watford

Spænskt veðurgrín

Það er ekkert verið að grínast með veðrið hérna á Mallorca - 12 stiga hiti, rigning og rok. Flíspeysan kemur sér vel. Hver átti von á því  - ágætis íslenskt sumarveður.

Ræddi við spænskan blaðamann í gær og hann skildi ekki orð í ensku, túlkur reddaði málunum, en ég sá síðan í dag hvað hann hafði skrifað í blaðið sitt og mér sýndist hann hafa ruglast hressilega á leikmönnum.

Gunnarssynirnir eru þrír, það er slatti af Sigurðssonum og þeir eru ekki alveg að fatta þetta hérna á Spáni. 

Vikan - wannabíkúr

Ég las Vikuna á leið minni frá Kef til Barcelona. kræst... stefni að því að vera á forsíðu eftir 66 vikur.

Sigurður Elvar missti vitið og 87 kg. á 89 vikum.

Annað eins "wannabí" tímarit hef ég aldrei áður lesið.

Fitusog....og megrun, gulrótarkúr, Curveskús, melónukúr, appelsínukúr, einarsbúðarkúr, ogégveitekkihvaðkúr....

Ömurleg tónlist

Barcelona er mögnuð (veit ekki hvort það má nota það orð eftir Rock Star þættina). Hótelið er rétt við Katalóníutorgið, Hotel Regina, sem er um 100 ára gamalt. Eina böggið sem kemur frá mér er ömurleg tónlist í morgunverðarhlaðborðinu.

Ég er viss um að þeir hafa ráðið einhvern "Jóhann Inga" sálfræðing í tónlistarvalinu. Instrúmental jazz,blúsbræðingur, með skemmtaraívafi, er eitthvað sem fær fólk til þess að staldra stutt við.

Og það er líklega hagkvæmt fyrir hótelið. Við borðum minna í morgunverðinum.

Annars er morgunverðarhlaðborðið magnað (úps, ætlaði ekki að koma að þessu tvívegis í sömu færslunni.)

Kaup mín á tveimur spænskum íþróttadagblöðum skiluðu ekki árangri. Skil ekki rassgat í spænsku, jú Cervesa... hvernig læt ég. Á Römblunni fengum við okkur sæti á veitingastað  - og viti menn, var ekki Eiki Guðmundsson stórafrekskylfingur og körfuboltatappi úr ÍR og Breiðablik á næsta borði. Blessaður Eiríkur var það eina sem datt upp úr mér.

Úps, 550 Íslendingar á vegum Eimskips í Barcelona, þeir voru út um allt.   

Kaldir Börsungar

Gat nú verið - kaldasti dagur vetrarins í Barcelona,

Messi og félagar voru í ullarpeysum á æfingu Börsunga.

Líklega hefur Eiður verið ber að ofan. 

Veðrið getur varla versnað úr þessu.

Adios í bili - vinnuferð á heitari slóðir á döfinni.

Íslenskur bolti á Mallorca á miðvikudag. 

Nánar síðar

Rukka alla leið?

 

Sturla samgönguráðherra hefur sagt að ekki komi til greina að þeir sem eiga leið í gegnum Hvalfjarðargöng þurfi að greiða fyrir afnot af öðru mannvirki á leiðinni til Rvíkur.

Afhverju ekki taka Oslóartilþrif á þetta.

Setja upp vegtolla út um allt og allstaðar. Þeir sem koma inn í borgina borga 150 kall  - punktur og basta. Alltaf, allstaðar en ekkert er greitt fyrir að fara út úr borginni.

Allir með kubb í framrúðunni og brosa síðan bara framan í myndavélina.

Bjó í tvö ár í Osló og ók um á íslenskum númerum á þeim tíma.

Vissi það ekki fyrr en eftir á að ég hefði bara átt að brosa framan í myndavélina og keyra í gegn án þess að borga.

Nojarinn nennti víst ekki að vera eltast við íslensk númer í þessu eftirliti  - létu það nægja að herja á grannríkið, Svíþjóð. 

Faxaflóahafnir vilja koma að framkvæmdum við Sundabraut

120 spírur á ári fyrir íþróttaefni

Í þessari færslu er gert ráð fyrir því að enski boltinn verði á sérstöð hjá 365.

Það hefur ekki verið útskýrt hvernig þessu verður háttað.

Verður SÝN áfram eins og hún er dag?, með íslenskt íþróttaefni, F1, spænska boltann, golf, póker, tuddareið og fleira? - 

Og þegar Ari Edwald talar um sér íþróttastöð fyrir enska boltann þá veltir maður því fyrir sér hvað þessi pakki á að kosta fyrir áskrifendur. 

Ég hringdi í 365 í dag og spurði um verða á mánaðaráskrift á SÝN,  -4.500 kr. á mánuði var svarið.

Ég spurði; Verður enski boltinn sýndur á SÝN??

Svarið var: "Ég veit það ekki fyrr en í maí.

Ég spurði; þarf ég þá að kaupa séráskrift að enska boltanum.

Svarið var: "Veistu að ég hef bara ekki heyrt frá yfirmanni mínum hvernig þessu verður háttað."   -

Sem sagt ný stöð um enska boltann, og þeir sem eru áskrifendur hjá SÝN virðast þurfa að punga 3000-5000 kr. á mánuði til viðbótar fyrir enska boltann. Kannski verður verðið lægra eða hærra. Hef ekki hugmynd um það en í dag greiða áskrifendur hjá Skánum um 3000 kr. á mánuði fyrir enska boltann. 

Eru Íslendingar tilbúnir að borga 8.000-10.000 kr. á mánuði fyrir íþróttaefni í sjónvarpi? Allt að 120.000 kr. á ári?  - Ég held að ég fái mér frekar nýtt golfsett  - árlega.

Það verður spennandi að fylgjast með þessu á næstu vikum og mánuðum. 

Sirkus tengdur Stöð 2 og í lokaðri dagskrá