Eyjólfur að hressast?

Það hefur mikið verið rætt um að Eyjólfur Sverrisson landsliðsþjálfari nái ekki að "mótivera" leikmenn landsliðsins fyrir leiki. Öskur, klapp og læti í búningsklefanum er nóg fyrir suma en ég held að þannig sé því ekki háttað hjá landsliðinu. Sumir hafa sagt að Eyjólfur sé leiðinlegur og nái ekki að rífa liðið með sér í baráttuna. Ég hef bara náð að kynnast betri hlið Eyjólfs og hann er langt frá því að vera leiðinlegur.

Haustið 1998 settist ég á skólabekk og bekkurinn minn í Noregi var fámennur og góður. Egil Drillo Olsen var einn af þeim sem kenndi okkur en hann var á þeim tíma búinn að koma norska landsliðinu í hæstu hæðir.

Í úrslit HM í Bandaríkjunum 1994 og Frakklandi 1998. Ef að Drillo er týpa til þess að ná upp stemmningu í landsliði þá er Eyjólfur skemmtikraftur. Drillo var ótrúlega "litlaus", lágstemmdur og lét aldrei fara mikið fyrir sér. En hann er klár kall.

Ég held að vandamál íslenska landsliðsins sé það að leikmenn liðsins eru margir búnir að ná því markmiði að komast að hjá "góðu" liði í Evrópu. Fjárhagsleg framtíð þeirra er tryggð og sá "sölugluggi" sem opnast í kringum landsleiki Íslands er ekki eins mikilvægur og áður. Landsleikir eru ekki eins mikilvægir og þeir voru áður. Það er því lítið um tæklingar, olnbogaskot og skallaeinvígi út við hornfánann. Það rennur varla blóðið í sumum leikmanna íslenska liðsins og því þarf að breyta. Fleir ný og fersk andlit sem nenna að hafa fyrir hlutunum. 

Athugasemdir

[Rúnar Birgir Gíslason, 8.6.2007 kl. 07:28]

Góður punktur Elvar, gott að einhverjir sjá hlutina með öðrum augum en æsifréttamennirnir.

Ég er ekkert endilega að bakka Jolla upp en ég held bara að hann sé ekki eina meinið í þessu máli.

Líklega á þetta við um allan pakkann, forystu KSÍ, þjálfarateymið og leikmenn.

[Arnar (IP-tala skráð) 8.6.2007 kl. 10:35]

Sammála ykkur. Maður þarf ekki að hafa mikið vit á fóbolta til að sjá að margir leikmenn í liðinu eru þarna á hálfum hraða. En ég held að það eigi að gefa  Jolla meiri tíma. Nota það sem eftir er af þessari keppni í uppbyggingu og samkvæmt nýjustu fréttum þá verður æfingamót á Kýpur eftir áramótin. Þá gætu línur farið að skýrast í þessum málum og ákveðinn kjarni gæti verið farinn að myndast. 

[Kristján Eldjárn Þorgeirsson, 8.6.2007 kl. 19:19]

Ég er mjög mikið sammála þér.  Guðjón Þórðar valdi þá í landsliðið sem nenntu að leggja eitthvað á sig.  Það má ekki hengja Eyjólf fyrir þetta.