Guðjón og kraftaverkin?

Menn eru oft lengi að jafna sig eftir höfuðhögg og fjallaloftið við Rauðavatn hefur líka einkennileg áhrif á blaðamenn hér á Morgunblaðinu sem og á Blaðinu.

Í grein Blaðsins í dag um félagaskipti knattspyrnumanna á Íslandi kemur bersýnilega í ljós að nýtt fjölnotaíþróttahús á Akranesi er að skila stórkostlegum árangri  - aðeins nokkrum mánuðum eftir að húsið var tekið í notkun.

Guðjón Þórðarson þjálfari ÍA er þekktur fyrir að ná árangri með unga leikmenn en samkvæmt frétt Blaðsins eru 8 nýir leikmenn komnir til ÍA.

Tvíburarnir Alexander og Indriði - sem eru reyndar ekki nema 11 ára og gerðu það gott á Shell mótinu á Akureyri í fyrra. Friðrik Arthúr Guðmundsson er einnig nefndur sem nýr leikmaður - hann er 12 ára og fjandi góður.

Ég er gríðarlega stoltur af uppbyggingarstarfi Skagamanna. 

Ráðleggur Terry að taka því rólega

Yfirlýsing

Frá og með 1. mars árið 2007 er undirritaður hættur stuðningi sínum við Golden State Warriors í NBA-deildinni. Tim Hardaway, Chris Mullin og Mitch Richmond voru hetjurnar sem heilluðu á sínum tíma en eftir að Hardaway kom út úr skápnum sem maður með "hommafælni" er ekki ástæða til þess að elta þetta lið lengur.

Síðuhaldari hefur ekki gert upp við sig hvaða lið fær stuðning hans. Valið stendur á milli Dallas Mavericks eða Phoenix Suns. Ástæðan einföld. Steve Nash heldur með Tottenham og hefur leikið með báðum þessum liðum. Ætla að sofa á þessu í einhverja daga. 

Akranesi 28. febrúar, 2007.

Sigurður Elvar Þórólfsson 

Fowler á leið til Bandaríkjanna?

Nei ég hef ekki séð Mýrina

Ég missti af Fídel Kastró. Veit ekki hvort það hafi langtíma áhrif á geðheilsuna að sjá eða heyra ekki í Kastró af og til.

Komst að því um helgina að ég er hrikalega lélegur í því að fara í bíó.

Hef ekki séð Mýrina eða snjómyndina sem gerist í virkjun norðan heiða.

Ég hef ekki séð eina sekúndu af X-Factor og heldur ekki af Íslandi í dag eftir breytingar. 

Þáttur BBC um Jörðina á mánudögum  á RÚV er aftur á móti  þáttur sem ekki má missa af. Snilld. 

Eina myndin sem ég hef séð í vetur er James Bond og það í A-sal Regnbogans Það er alveg hægt að gera betur í þessum efnum. Ekki spurning. 

Það væri ráð fyrir dagblöðin að ráða blaðamenn í að skrifa stutta lýsingu á því sem er að gerast í ýmsum framhaldsþáttum sem virðast allir vera á sama tíma.

Lost er að verða eins og Dallas - það gerist ekkert. Datt inn í þann þátt í síðustu seríu en ég hef misst áhugann. 

Heroes lofar góðu og CSI klikkar aldrei.

Legg til að einhver taki það helsta úr Lost og skrifi um það í blöðunum  - þá verða mánudagskvöldin auðveldari á mínu heimili. Ég myndi lesa slíka grein  -ekki spurning.  

Kastró í beinni útsendingu í útvarpi

Getuleysi?

Rakst á fína frétt í Blaðinu í morgun um Henrik Stenson, atvinnukylfing frá Svíþjóð.

Þar segir:

Henrik Stenson hætti leik á móti eftir níu holur vegna getuleysis fyrir fimm árum:

Samkvæmt reglum má vera með 14 kylfur í pokanum. Sköftin á kylfunum eru mismunandi. Sum eru mjúk, önnur stíf og enn færri mjög stíf. Þau eru flest úr stáli en á síðari árum hafa grafítefni verið vinsæl.    

Kastljósinu beint að Birgi á nuddbekk í Indónesíu

Scheffer í hlutverki sveitahundsins

Ég velti því fyrir mér hvaða dóm ég fengi ef ég færi að "plaffa" niður hunda sem ganga lausir og hafa valdið mér og minni fjölskyldu ónæði á undanförnum árum.

Þessar pælingar skutu upp kollinum um helgina við veitingasöluna við Geysi.. þar var risastór Scheffer hundur í hlutverki sveitahundsins.... hljóp meðfram veginum og gelti á allt sem hreyfðist.

Það var ekkert "krúttlegt" við þessa skepnu. 

Á þessum hlaupaferðum var hundurinn í 20-30 metra fjarlægð frá göngustígnum að hverasvæðinu við Geysi.

Ég greip þéttingsfast í hönd barnsins sem var með mér í för og reif það með mér yfir götuna í átt að hverasvæðinu.

Ég var sannfærður um að Schefferkvikindinu væri meinilla við hveralykt. Góð áætlun...

Það reyndist rétt en ég er viss um að 50 manna hópur ferðamanna hefði stokkið hæð sína í anda Gunnars á Hlíðarenda hefði "kálfurinn" komið á skriði í áttina að þeim. Ójá ég fatta það núna. Þeir voru enn í rútunni og þorðu ekki út. 

Food and fun hvað?

Vorið 1999 var ég í svipuðum pælingum þegar risastór "bikkje" stal matnum okkar af grillinu við Sognsvatn í Osló. Ekkert merkilegur matur í boði, Gilde pulsur, en helvítið gúffaði 5 pulsum ofaní sig á 0,24 sek.

Norskt met.

Skömmu síðar kom grindhoruð kolvetnisæta í hlaupagallanum út úr skóginum og kallaði á kvikindið sem var þá að sleikja út um fyrir framan okkur. Ég öskraði eitthvað á kellinguna, afsakið orðbragðið, sem átti hundinn en líklega var ég ekki nógu góður í norskunni á þeim tíma  - hún sýndi engin viðbrögð. Hún þurfti ekki að hafa áhyggjur af því að gefa skepnunni að éta.

Það sauð á mér. Sjóðheitt grill, kaldur Ringnes, en engar pylsur. 

Í framhaldinu datt mér í hug hvort ekki væri hægt að ráða einhvern aðila í að "hreinsa" til á svæðinu, Sopranos lausnina, en ég róaðist aðeins niður við próflesturinn þá um vorið þrátt fyrir að hafa kannað ýmsa möguleika.

Hundar eru fínir, ef þeir eru bundnir eða í ól. Lassie er líka ágæt, en þeir hundar sem ganga lausir og hrella börnin mín eru ekki á jólakortalistanum.  

Íslendingur í gæsluvarðhaldi í Bremerhaven

OHF-barinn

Stundum er mikið að gera í vinnunni og mistökin renna í gegnum allar síur og eldveggi –

Íþróttafréttamenn á RÚV voru utan við sig í gærkvöld þegar úrslitin úr einum leik í úrvalsdeild karla voru fréttaefnið.

Fjölnir  - Þór Þorlákshöfn. Framlengdur leikur og Fjölnir hafði betur.

Fréttastofa RÚV, öryggisventill okkar allra var með þetta alveg á hreinu.

Þessi úrslit skiptu miklu máli fyrir fjölmennasta íþróttafélag landsins og að sjálfsögðu fyrir íbúa Þorlákshafnar. Bæði lið í fallbaráttu.

Adolf Ingi í útvarpsfréttum kl: 22: 

“Og Haukar lögðu Fjölni með 78 stigum gegn 72.” ?

Tja...ég veit ekki alveg hvaðan þetta kom hjá Dolla.  

Lovísa í sjónvarpsfréttum kl: 22.

“Og Fjölnir og Þór frá Þorlákshöfn gerðu jafntefli” ?

Tja... jafntefli í körfubolta, ekki til.

Það tíðkaðist á árum áður í blaða - og fréttamannstéttinni að fá sér aðeins neðan í því af og til. Og jafnvel í vinnunni.

Er búið að opna OHF-barinn í Efstaleiti?

Ef svo er. Þá á að bjóða fólki í heimsókn.

 

Daniel Baldwin edrú í 92 daga

Handrukkari með hund

Einu sinni sagði góður maður við mig að ég ætti aldrei að skrifa neitt þegar ég væri reiður. Hef reynt að halda mig við þá reglu.

Er því í ágætu skapi þegar ég skrifa þessa færslu en ég hef meiri áhyggjur af því hvað sé að gerast í toppstykkinu á atvinnumanninum í handbolta sem pissar yfir íþróttadeild Morgunblaðsins og mbl.is

Atvinnumaðurinn verður neðstur á vinalista mínum hér til hliðar þar til síðar. Var jafnvel að velta því fyrir mér að eyða gaurnum.

Ákvað þess í stað að fá nágranna hans til þess að hrella hann eitthvað fram eftir vetri þar til hann þrífur upp hlandið.

Það eru til ýmsar aðferðir til þess.

 

Tottenham mætir Braga í UEFA-bikarnum

Hundar, konur, karlmenn

Í dag fylgdi sérblað um konur með Blaðinu  -

Morgunblaðið verður með sérblað um hunda.

Hvenær verður sérblað um karlmenn? 

Tja. erfitt að segja - Jú ætli það sé ekki erfitt að selja auglýsingar í slík sérblöð þegar ekki má auglýsa bjór, klám og netaboli. 

E.s. Hef boðað komu mína á hótel Sögu laugardagskvöldið 3. mars.

Umsókn mín er í meðferð hjá hótelstýru og beljubóndanum í bændakofanum.

Keypti einu sinni Tígulgosann  - og lærði dönsku með því að lesa gráu síðurnar í Rapport.

Kemst líklega aldrei inn á helv. hótelið. 

Federline fer fram á flýtimeðferð í forræðismáli

Áfall að vera kallaður framsóknarmaður

Þessi færsla er ekki skrifuð af seth. Það komst einhver yfir lykilorðið mitt.

Ég sé að það eru fleiri sem heimsækja síðuna en áður. seth er í kringum 120. sætið á listanum yfir vinsælustu síður blog.is. Það eina sem angrar mig er að Framsóknarblaðið í Vestmannaeyjum er á svipuðum slóðum. Verð að finna leiðir til þess að koma mér neðar á listann eða ofar. Fyrri leiðin er mun auðveldari. 

Eitt mesta áfallið sem ég hef orðið fyrir í vinnunni var þegar ég var  kallaður framsóknarmaður seint á föstudagskvölid.

Rétt fyrir deadline. Ástæðan var sú að ég þekkti Björn B. Jónsson, hinn ágæta formann UMFÍ, á mynd sem var send á ritstjórn Morgunblaðsins.

Og kollegar mínir lugu að sjálfum sér að þeir vissu ekki hver maður er. Þeir vildu ekki láta bendla sig við XBéið.

Hef ekki getað þvegið af mér XBéið frá þeim tíma og að auki var vinnustöðin sem ég hef afnot af á Mogganum með tölvu sem hét BINGI (Björn Ingi Hrafnsson).

BINGI er farinn yfir móðuna miklu og nýr og snarpari gripur settur upp í staðinn. Enn og aftur. Ég er ekki framsóknarmaður. 

Lykilorð sýnileg á blog.is fyrir mistök

Hjartað hætti að slá um stund

"Innbrotið" er líklega fyrnt og því er allt í lagi að segja þessa sögu. Gamla settið, foreldrar mínir, voru að rifja upp skemmtilegt atvik í gær eftir saltketið og baunirnar.

Sveitavargarnir voru á ferð í Höfuðborginni fyrir um 17 árum. Veturinn 1990. Frumburður þeirra var þá að leigja íbúð í vesturbænum, í Faxaskjóli að mig minnir. Hún lánaði foreldrum sínum lykil að íbúðinni þar sem þau ætluðu að gista. Eftir heimsókn hjá Dóra frænda óku þau um hánótt út að Faxaskjóli.

Karl faðir minn tók upp lykilinn en það gekk illa að opna kjallaraíbúðina. Öll trix í bókinni voru prófuð hvað lykilinn varðar en ekkert gekk. Mútta fann opinn glugga á þvottahúsinu og sá gamli renndi sér þá leiðina í þvottahúsið.

Þar var barnavagn og fannst honum það ekki passa - en kannski voru hinar stelpurnar (meðleigjendurnir) að geyma þetta dót - hugsaði hann. Gömlu konunni var hleypt inn og þau fóru að bera inn töskurnar í forstofuna. Það var ljós á ganginum og sá gamli fór inn í íbúðina og opnaði herbergið þar sem að frumburðurinn hafði aðsetur.

Þegar þau litu inn var fullt af barnadóti á gólfinu? Þau horfðu furðu lostinn á hvort annað. Hjartað í þeirri gömlu hætti að slá um stund. Þau voru í röngu húsi.

Gamla settið læddist út í myrkrið með farangurinn. Gengu að næsta húsi við hliðina, tóku upp lykilinn  - og viti menn. Hann passaði. Samkvæmt mínum heimildum gekk þeim illa að sofna vegna hláturs 

- en sagan er góð.   

Spears svarar í símann hjá 365

Stafræn bylting, jea right.

Digital Ísland er böl og óútreiknanlegur fjandi. Var að reyna að horfa á Lille - Man Utd. á Sýn í kvöld.

Allt frosið og Wayne Rooney líktist Craig Bellamy á 16. teig (bjór).

Karl faðir minn, einlægur stuðningsmaður Man. Utd. var ekki ánægður með ástandið. Hann var þó saddur eftir sprengikjetið og baunirnar  -ástandið var því þokkalegt. 

Á sama tíma voru fín gæði á SÝN Extra 1 og 2 þar sem Real Madrid - Bayern München og PSV - Arsenal voru í beinni.

Ég hringdi í þjónustuver 365, tæknileg aðstoð. Ungur maður, drengur , eða nýliði svaraði eins og hann gat. En hann hafði engin svör.

Fyrsta spurningin var þessi:

"Hvers vegna er útsending SÝNAR í einhverju rugli á meðan SÝN Extra 1 og 2 er í fínum málum?"

Gaurinn vann fyrir kaupinu sínu og fór að spyrja til baka:

365.) Er loftnetið í lagi.

seth: "Já ég keypti risastórt örbylgjuloftnet í október fyrir mörg þúsund kr."

365.) Settir þú loftnetið upp sjálfur?

seth: "Nei, fagmaður, rafeinda - og rafvirki. Eðalmaður."

365.) Sér loftnetið sjóinn?

seth: "Hvað áttu við?"

365.) Sér loftnetið sjóinn?, er sjórinn nálægt húsinu þínu?

seth: Nei, erum í svona 500-800 metra fjarlægð frá sjónum. Og Akranes er sko hinu meginn við Faxaflóann. Örbylgjusendingin þarf að fara yfir sjóinn og loftnetinu er beint í átt til Reykjavíkur - skiluru..loftnetið vísar í átt að Reykjavík en ekki Snæfellsjökli," sagði ég og var reiður.

"Veistu að ég ég hef hringt oft í þjónustuverið og spurt um svipaða hluti. Svörin eru aldrei eins. Ég þarf bara að fá að vita afhverju SÝN sést ekki hjá mér en ég get horft á SÝN Extra 1 og 2. Það er eina vandamálið." 

365.) Heyrðu ég ætla ekkert að vera ljúga að þér. Ég hef ekki hugmynd um hvað er að.

seth: "Ok það er heiðarlegt svar. Það er þá ekki bara af því það er þriðjudagur.  -Þetta Digital Ísland er algjört krapp," sagði ég.

365.) Veistu að sumir eru bara ótrúlega óheppnir með þessi mál.

seth: "Hvað áttu við?"

365.) Það er bara misjafnt hvernig útsendingar okkar nást.

seth: "Ég var einmitt að hringja í þig út af því.. vertu sæll..." 

Britney Spears farin í meðferð

Pissað á kennara

Craig Bellamy og 9-járnið kemur upp í hugann þegar maður les þetta piss um kennara, laun og starfsdaga þeirra.

Ég veit ekki hvort umræddur blaðamaður hefur starfað í grunnskóla sem kennari. 

Ég get fullyrt að það er mun auðveldara að vera blaðamaður en kennari. Hef samanburðin eftir 8 ár í starfi sem kennari. 

Þrítugur umsjónarkennari sem ber ábyrgð á 20 börnum fær um 220.000. kr. á mánuði og launatafla kennara er sorglegt plagg. 

Skipulagsdagar í grunnskóla minna barna eru 13 alls samkvæmt skóladagatali en 8 þeirra eru utan þess tíma sem börnin eru í skóla. Í raun eru aðeins þrír skipulagsdagar þar sem ég sem foreldri þarf að gera ráðstafanir.

Og er það ekki eðlilegur hluti af pakkanum?

Hvenær eiga kennarar að skipuleggja starfið eftir að það er hafið?

Á kvöldin?

Skólar eru lifandi vinnustaðir þar sem að margt getur breyst á stuttum tíma og kennarar þurfa tíma til þess að funda og skipuleggja sitt starf.

Þriggja mánaða sumarfrí er nefnt sem staðlað sumarfrí kennara í áðurnefndu pissi.

Það var á þeim tímum sem sjónvarpið var í fríi á fimmtudögum.

Sumarfrí kennara er 8-9 vikur í rauntíma og miðað við staðsetningu Íslands á jörðinni þá væri það mannvonska að stytta sumarleyfi grunnskólabarna niður í 6 vikur.

Ég styð kjarabaráttu kennara heilshugar.
 

Konur og skák, part II

Konur og skák. Fyrir nokkru velti ég því fyrir mér afhverju það er keppt í kvennaflokki í skák?

Fékk ekki nein viðbrögð frá konum um þetta atriði.

Konur hafa unnið hörðum höndum að bættri stöðu sinni í samfélaginu sem er að sjálfsögðu hið besta mál. Afhverju hafa ekki konur óskað eftir því að fá að keppa í opnum flokki í skák og bridge.

Í mörgum íþróttum er líkamlegur styrkur helsta vopn þeirra sem þær stunda og konur ættu undir högg að sækja í þeim samanburði. Sumar konur en alls ekki allar.

Í skák og bridge er útsjónarsemi og almenn þekking það sem skilur á milli þeirra bestu og næst bestu.

Ég skora á konur að taka þetta mikilvæga jafnréttismál upp.  

Dennis Rodman á son

Það ískrar í manni að fá endalaust fínar fréttir af Liverpool. Bellamy gæti verið sonur Dennis Rodman, þeir hafa kannski fengið svipað uppeldi. 

Ég veit ekki hvernig týpa John Arne Riise er en norskir fjölmiðlar hafa elt hann á röndum undanfarin ár. Hann dregur víst skuldahala á eftir sér, sendir vafasöm SMS-skilaboð og lendir í slagsmálum við John Carew í rútu norska landsliðsins. 

Ein þekktasta fyrirsæta Noregs var allt annað en ánægð með tölvupóst sem að Riise sendi henni rétt fyrir jólin.

"Lefty" var að bjóða henni út að borða og sendi þessa ágætu mynd.

Kannski að Bellamy hafi fengið sama boð frá Riise. Veit ekki. Kannski er röddin hans Riise svona skelfileg að það réttlæti golfæfingar. Tja.   

Bellamy fær þunga sekt

Breiðavík og atvinna

Héraðsfréttablaðið Skessuhorn heldur úti fínum fréttavef.

Þar er að finna skondna frétt af bifreiðakaupum útgerðarfélags frá Rifi á Snæfellsnesi.

Í ljósi frétta síðustu daga og vikna þá held ég að eigendur þessa fyrirtækis þurfi á "peppræðu" að halda.

Fréttin er góð.  

 

   

 

Pétur lukkutröll

Pétur Örn Guðmundsson, Buffari, er ekki lukkutröll í Júróvísion þrátt fyrir góðar rispur í bakröddunum.

Pétri er  ekki ætlað að fara til útlanda í ár.

5 sénsar af 9 og ekkert í topp þremur. Tja. Erik Hawk í Helsinki.. er það bara ekki málið.

Eiríkur Hauksson verður fulltrúi Íslands í Helsinki

Furðufugl

Sem áhugamaður um golf þá spyr maður sig hvort Bellamy hafi fengið par, skolla eða fugl?

Ég skýt á furðufugl. 

Sakna þess enn að enginn hefur lagt fram svar við spurningunni.

Afhverju er keppt í kvennaflokki í skák? 

 

Bellamy lamdi Riise með golkylfu

Loftsteinn í hausinn

Fínar fréttir af deCODE Genetics.

Loftsteinn í hausinn?, eru ekki meiri líkur á því en að hlutabréfin hækki hjá Kára og félögum?  Samt sem áður. Góðar fréttir.

Sakna þess enn að enginn hefur lagt fram svar við spurningunni.

Afhverju er keppt í kvennaflokki í skák?  

Hækkun á bréfum deCODE

Harley, leður og Jabbar á trýninu

Pétur Gunnarsson, fyrrum vinnufélagi minn á Morgunblaðinu, er að rifja upp rimmu Gunnars Örlgygssonar og Magnúsar Hafsteinssonar á blogginu sínu.

Hef aldrei verið í návist Gunnars og Magnúsar þegar þeir hafa talað saman.

Magnús, mótórhjólið og fjölskyldan mín fórum í sömu ferð með gömlu Norrænu sumarið 2000 yfir hafið frá Bergen. Það var ekki planað.

Ógleymanleg ferð. Fer aldrei aftur sjóleiðina. 

Fellibylur eða rest af slíku fyrirbæri skall á helv. dallinum rétt eftir að lagt var í hann.

Var að reyna að horfa á Norge gegn Spánverjum í beinni frá EM.

Gafst upp í hálfleik, þar sem ég gat ekki haldið lengur í súluna sem ég notaði til þess að halda mér og stólnum á sínum stað. Aumingjaskapur af minni hálfu. En gamla Norræna var 48 tímum of sein til Seyðisfjarðar. 

Magnús var spakur í matsalnum í leðurgallanum, gúffaði í sig rækjusamloku og færeyskum bjór að mig minnir. Sjóari þar á ferð.

Hef ekki séð hann hjóla eftir það.

Gunnar var mikil skytta í körfunni hjá Njarðvík. Fékk sjaldan að eiga við hann í vörninnni. Gunnar sá að mig minnir illa og lék með svona "Jabbar" græju á trýninu í mörgum leikjum.

Stundum gleymdi hann gleraugunum og var ekki einu sinni með linsur í leikjum.

Þeir sem best þekkja til segja að Gunnar hafi aldrei leikið betur en þegar hann var linsulaus á parketinu í "Ljónagryfjunni" í Njarðvík.

Ég held að Ívar Páll Jónsson ,fyrrum Moggamaður, gæti komið með skemmtilega nálgun á raunveruleikaþætti þar sem að Gunnar og Magnús kæmu við sögu.

Sakna þess að enginn hefur lagt fram svar við spurningunni. Afhverju er keppt í kvennaflokki í skák?  
 

Talandi salerni minna menn á að aka ekki ölvaðir

Kaffi og með því

Njóttu dagsins í vinnunni. Eða þannig. Orri Harðarson er með fína lýsingu á fyrsta og jafnframt síðasta vinnudegi sínum á DV. Orri er með betra tóneyra en þeir þarna á DV og auðvitað líka á RÚV.

Fréttastefið skilur þar á milli.

Orri var nokkuð lipur í körfubolta í denn, fór með hann í keppnisferð til Grindavíkur að mig minnir fyrir rúmum tveimur áratugum. Reyndar  er Orri örvhentur...en hann getur víst ekkert gert að því. Sumir segja að það sé kostur. 

Sá í gær að Jónína Ben hefur verið á fínum veitingastað í London - örugglega góður matur, gott rauðvín, kaffi og með því... blogginu hennar var allavega breytt töluvert eftir gærkvöldið. Tja...... lýsi eftir vitnum.

Fékk fyrstu meldinguna í gestabókina í dag og viti menn, karl faðir minn búinn að þefa bloggið mitt upp.

Hef ekki sagt einum manni frá þessu bulli - og slatti af fólki fer hér inn af og til. Igor verður með fasta pistla í framtíðinni hér á þessum stað og þá sérstaklega um verkun á sviðalöppum.

Sviðalappir eru og eiga að vera bannvara.

Reyndar var það kanínukjöt sem vakti áhuga hans á blogginu. Matur er það eina sem sumir hugsa um. Jú og kannski eldhúsinnréttingar.

Ég sakna þess að enginn hefur lagt fram svar við spurningunn. Afhverju er keppt í kvennaflokki í skák?   

Lögreglan lýsir eftir vitnum