Fermingarsettið dugði í 18 ár

Móðir mín hefur áhyggjur af því að ég láti öll fjölskylduleyndarmálin fljóta út á þetta bloggbull mitt.

Tja.... það er ýmislegt sem hún þarf að hafa áhyggjur af.

Reyndar vorum við að rifja upp í dag hve mikið hlutirnir hafa breyst.

Níu ára púki fékk í dag golfsett frá stórfjölskyldunni í afmælisgjöf. Sérhannað fyrir börn og mun betra en það sem kylfingar á mínum aldri fengu sem fyrstu verkfæri í íþróttinni. 

Mútta minnti mig á það að ég hefði ekki fengið golfkylfur fyrr en ég fermdist.

Það er alveg rétt. Fram að því notaði maður bara afsagaða "sjöu" úr gömlu setti. Það dugði fínt en skaftið var eins og steypustyrktarjárn og hlutföllin í kylfunni langt frá því að vera rétt.

Ég vona að þessi texti hafi ekki farið út fyrir velsæmisstuðul G. Kolbeins - Vísar í klám á nokkrum stöðum, sjöan er rétt við sexið, og skaftið getur verið mjúkt, millistíft eða stíft.

Fermingarsettið, McGreogor Lite, dugði vel og því var ekki skipt út fyrr en sumarið 2000 - eftir 18 ára notkun.

Frábærar kylfur en það var aðeins farið að láta á sjá.

Hef ekki snert á McGregor Lite í sjö ár.

Lite í fljótandi formi hefur tekið við.   

 

Bútasaumur og Róland brosti

Þessi úrslitaleikur fer í sögubækurnar fyrir þrennt:

1.) Fyrir slagsmálin. Get ekki dæmt um það hvernig þessi mál þróuðust en það er greinilegt að sérsamböndin þurfa að efla gæslu á svona viðburðum.

2.) Fyrir bútasaum í beinni útsendingu RÚV. Brjánn og Patrekur alblóðugir eftir samstuð. Sláturgerð á hliðarlínu vakti athygli þeirra sem stóðu að útsendingu RÚV. Blóð út um allt - sumir þola rauða litinn illa.

3.) Róland Eradze markvörður Stjörnunnar brosti í leiknum.  Enda ástæða til. Þvílíkir yfirburðir Stjörnunnar.  

Átök á áhorfendapöllum Laugardalshallar

Frábær samkeppni

Það kemur fyrir að betri helmingurinn sofnar í sófanum þegar við horfum á sjónvarpið. Getur verið kostur. Eins og í kvöld.

Horfði um stund á útsendingu á SÝN frá pókerkeppni og það er maður sem lýsir tilþrifunum á íslensku. Hvar eru áhorfstölurnar þegar slíkt efni er á boðstólum.

Er þetta ekki betra en X-Faktorinn og kannski með svipað áhorf.

Það sem gladdi mig mest var að samkeppnin í sjónvarpsbransanum er gríðarleg. Á sama tíma og spilaður var póker á SÝN var einnig leikinn póker á Skjá 1.

Og það efni var textað....

Ég gleymdi mér alveg yfir þessum ósköpum...frábært sjónvarpsefni. 

Lyklakippa

Það var ekki við öðru að búast þegar þessir gaurar koma saman á ný.

Reyndi að kaupa miða í gegnum U2 síðuna fyrir nokkrum misserum  -skráði mig í u2 klúbbinn og fékk lyklakippu og allt.

Helv. heimasíðan krassaði síðan þegar byrjað var að selja á netinu og lyklakippann sökkaði feitt.

Tölvukerfið hefur staðið Police af sér í þetta skiptið.

Mikið væri nú gaman að heyra í þessum köppum live.

Kannski koma þeir í Egilshöll, hver veit??? enda hægt að græða vel á ölsölu á þeim bænum.

Það kostaði aðeins 750 kall fyrir lítinn Faxehortitt á Roger Waters tónleikum sem ég fór á í fyrra. Og ég keypti tvo

Gjafprís. 

Seldist upp á alla tónleika The Police í Bretlandi á klukkustund

"Hvati" í Monkey Bay

Ég vissi ekki fyrr en í dag að þessi stofnun væri til.

ÞSSSSSSSSÍ...eða eitthvað svoleiðis.

Ríkisapparatið er stærra en maður heldur.

Sighvatur Björgvinsson? (hver man eftir honum?), var reiður í viðtali við Stöð 2 í hádeginu.

Tæknimenn þar á bæ fá prik fyrir myndatextann sem var birtur þegar símaviðtal var tekið við Sighvat.

Þar stóð: Sighvatur Björgvinsson talar frá Monkey Bay í Malawi.  Myndin hér til hliðar er samkvæmt google frá þessum fallega stað.

Ég brosti út í annað, gott staðarnafn, en staðurinn virðist fallegur. 

Utanríkisráðuneytið hafnar fullyrðingum framkvæmdastjóra ÞSSÍ

Alex er flott nafn

Alex  -flott nafn.

Munaði engu að miðbarnið hefði fengið það nafn.

Axel varð niðurstaðan - enn flottara.

Skemmtilegur endir á leik Arsenal og PSV, fyrir okkur Tottenham-mennina.

Spurning um að  kaupa  Philips flatskjá?

Þeir komu sterkir inn eftir þetta kvöld.

 

 

 

PSV sló Arsenal út úr Meistaradeild Evrópu

Í einu af 400 efstu sætunum

Það er áhugavert að kíkja af og til á  lista yfir vinsælustu bloggarana á Moggablogginu. 

Hef það sem markmið að vera einn af 400 efstu.

Hvetjandi kerfi.

Sigmar í Kastljósinu trónir á toppnum og hefur tekið við af Denna sem hefur flutt sig yfir á bloggið á Vísi.

Hef ekki séð neina talningu á Vísisblogginu eða lista yfir hverjir eru að skora hátt. Væri það ágæt leið fyrir Vísismenn að setja slíka talningu inn á bloggsvæðið á Vísi? Upp með sokkana..  

David Navarro? eða David Navarro?

David Navarro er þekktur tónlistarmaður - var í Nirvana (sem er bara bull, sjá athugasemd hér fyrir neðan)  og kom við sögu í Rock Star þáttunum. Nafni hans úr spænska liðinu Valencia á Spáni, 27 ára gamall knattspyrnumaður, David Navarro fór á kostum í leikslok í viðureign Valencia og Inter frá Mílanó í kvöld í Meistaradeildinni. Navarro er í gráa æfingagallanum á myndunum hér fyrir neðan. Tónlistarmaðurinn er í  fínni sveiflu á lífrænt ræktuðu frá  Köben  hér á  myndinni til hliðar.

Sýn hefur sinnt boxíþróttinni ágætlega og það var skemmtileg blanda í kvöld þar sem að markalaust jafntefli spænska og ítalska liðsins fór úr böndunum í leikslok.

Algjör farsi þar á ferð. Þar sem að slagsmálin bárust inn í búningsklefa. Fínar myndir frá þessum atburði í sjónvarpinu en ég bjóst alltaf við því að UEFA myndi ritskoða þetta dæmi og hætta að sýna frá slagsmálunum.

UEFA mun eflaust úrskurða marga leikmenn í keppnisbann í kjölfar atburðarins. Frábær viðbót við annars viðburðaríkt keppnistímabil á Ítalíu og hressir aðeins upp á Spánarsparkið...Logi Ólafsson átti setningu kvöldsins í Meistaradeildinni.

Það er ekki aðeins spurning um hvort Frank Rijkaard ætti að skipta um leikaðferð í hálfleik. Hann ætti líka að skipta um hárgreiðslu," sagði Logi. 

 

Chelsea slapp áfram gegn Porto

365, 36error6,

Það hefur lítið farið fyrir umfjöllun um gríðarlegt tap Dagsbrúnar á síðasta rekstrarári. Jón Axel Ólafsson fyrrum útvarpsmaður er með fínar pælingar á heimasíðu sinni um það mál.

Steingrímur Sævarr Ólafsson er með bein í nefinu að gagnrýna sitt eigið batterí á nýja blogginu sínu.  Hann fær eitt prik fyrir það en annað er dregið af honum fyrir helv. bókina sem hann heldur alltaf á í nýja starfinu sínu.

Denni er duglegur að blogga á nýja staðnum og dagurinn í dag er met að ég held. Kannski hefur hann tekið það alvarlega sem Ingvi Hrafn Jónsson segir um Vísisbloggið og það fær ekki háa einkunn hjá Ingva Hrafni. En það er gott fyrir alla að hafa samkeppni á þessu sviði sem öðru.

Það verður áhugavert að fylgjast með hvort stórspurningamanninum Denna tekst að hjartahnoða vísisbloggið  úr dauðadái.Þeir hljóta að vera hundrað sinum fleiri í það minnsta sem blogga á mbl. Að minnsta kosti heimsóttu mitt blogg á fyrsta degi á moggabloggi fleiri en höfðu á vísisbloggi á 6 vikum. Annars er Dennablogg því miður svipur hjá sjón, eftir að hann varð Ritstjóri Íslands í dag. Annars bíð ég á hverjum degi eftir því að einhver stórtíðindi gerist með Vísi.is,sem alltaf er verið að boða að eigi að gerast. Finnst síðan útlitslega litlaus og óspennandi,ljósárum á eftir mbl.is,þrátt fyrir að þar séu innanborðs menn úr hópi mestu reynslubolta íslenskrar blaðamennsku eins og  Oli Tynes bróðir minn og Halli Thorst.

Hagvöxtur

Það er eitthvað undarlegt að gerast í höfðinu á mér.

Stjórnmálin verða á vegi mínum hvert sem ég fer.

Í dag sem oftar hlustaði ég á Rás 2 á leið minni upp á Skaga úr Rvík.

Þar var verið að ræða um væntanlegar úrbætur á samgöngum í Rvík.

Gísli Marteinn Baldursson var í viðtali og hann sagði m.a. frá því að gríðarleg fjölgun á einkabílum hefði átt sér stað á síðustu 12 árum á meðan R-listinn réði ríkjum í borginni ?

Stundum finnst mér svör stjórnmálamanna loðin og undarleg - stundum leiðinleg.

En eru það góð rök að setja fjölgun einkabíla í Rvík í samhengi við R-listann og Strætó. Ekki það að mér sé ekki sama um R-listann og hans gjörðir.

Hagvöxtur?? Er hann ekki líklegri sökudólgur..

Er ég kannski alveg að missa af samhenginu? 

Einu sinni sá ég þingmann

Ég var að hlusta á útvarpið á leið til vinnu í morgun þar sem að Sæunn Stefánsdóttir úr Framsóknarflokknum og Björgvin G.Sigurðsson úr Samfylkingu voru að ræða um störf Alþingis.

Þar var m.a. rætt um þá staðreynd að almenningur hefur ekki eins mikið álit á störfum Alþingis og á árum áður. Þau voru bæði með ágætar skýringar á þeirri þróun.

Sæunn sagði að mikil vinna fylgdi starfinu og það væri mikilvægt fyrir Alþingismenn að hafa tíma til þess að hitta kjósendur þegar hlé væri gert á þingfundum.

Í þessum löngu hléum sem gerð eru með reglulegu millibili á hverju ári. Ég fór að velta því fyrir mér að ég hef aldrei hitt þingmann í slíku hléi.

Einu sinni sá ég Jóhann Ársælsson með barnabarnið sitt í íþróttaskóla FIMA á Akranesi. Gísla S. Einarsson sá ég stundum uppi á golfvelli. Ræddi ekki við hann um stjórnmál.

Magnús Hafsteinsson býrí næstu götu við mig en ég hef bara séð hann á jakkafötunum að elta kanínurnar sem eru í hans eigu í garðinum mínum. Ræddi ekkert við hann.

Aðra þingmenn hef ég aldrei hitt samt hef ég kosið frá árinu 1987.   

Konur í Samfylkingu og Framsókn á leið til vinstri

Rauðar rósir

Það er að hellast yfir mig kosningavalkvíði - er alveg að tapa mér í djúpum pælingum, hver sagði hvað við hvern og afhverju? Hver gerði hvað við hvern og afhverju?

Er alveg Lost að hafa ekki séð Silfrið í marga mánuði og ekki lesið stjórnamálapælingarnar hér á Moggablogginu.

Gísli S. Einarsson núverandi bæjarstjóri á Akranesi leysti valkvíðann með einföldum hætti hjá mér árið 1987.

Hann og stuðningsmenn hans voru með fínt partý á gamla Hótelinu á Akranesi. Kvöldið varð til þess að Gísli og gamli Alþýðuflokkurinn fékk atkvæðið. 

Held meira að segja að ég hafi sagt ömmu Buggu, mömmu og pabba frá glæpnum og þau voru bara ánægð.

Ég er enn að bíða eftir því að fá boð um gott partý hjá þeim flokkum sem bjóða fram hér í n-vesturkjördæmi.

Lofa engu um atkvæðið en það vantar meira stuð í kosningabaráttuna.

Stjórnarandstaðan boðar til blaðamannafundar

Hitti naglann á höfuðið

Hver hefði trúað því að umbrotsmaður á Morgunblaðinu, sem heldur með Fylki og er rétt í meðallagi góður í golfi, hafi hitt naglann á höfuðið á lokakafla leiks West Ham og Tottenham í gær.

Ágætur blaðamaður úr Kópavoginum, Hjálmar Jónsson, stökk hæð sína í loft upp þegar Zamora koma West Ham í 3:2. Útlitið var bjart, Hjálmar var í stuði. 

Þá kom gullkornið frá umbrotsmanninum snjalla.

"Tottenham vinnur 4:3," sagði hann. Skömmu síðar skoruðu mínir menn tvö mörk í röð. Stalteri stráði salti í sárin. Já, Stalteri.....

Það heyrðist ekkert það sem eftir var kvöldsins frá Hjálmari - Hann sagðist vera upptekinn við vinnu. Rétt fyrir miðnætti var Hjálmar eðlilegur á ný. Það tekur á að halda með West Ham. 

Skil það vel.  Þvílíkur leikur. 

Dökkt útlit hjá West Ham

Einföld íþrótt

Hlé var gert hjá verkamönnum á Bjargi á Akranesi þegar þessi leikur fór fram í dag. Um það var ekki samið í kjarasamningum verktaka.

Úrslit leiksins voru með þeim hætti að ekki verður gert meira úr því máli.

Knattspyrna er frekar einföld íþrótt.

Fær stuðningsmenn til þess að borða nagla ef því er að skipta.

Ég hef enga skoðun á úrslitum leiksins sem stuðningsmaður Tottenham.

En samt sem áður er alltaf gaman að sjá stuðningsmenn Liverpool kvarta og kveina eftir slíka tapleiki.

Það eru ótrúlega margir sem halda með Liverpool. Ég veit ekki afhverju.

Á myndinni má sjá stuðningsmann Liverpool borða nagla eftir tapið í dag.

Einnig má sjá afleiðingar þess þegar húsbóndinn ætlar að mála eldhúsinnréttinguna enn og aftur en sú sem ræður öllu ákveður að nú sé nóg komið að "make up" aðgerðum.

Og rétti húsfreyjan þeim gamla hamar og sleggju til þess að verkið yrði með þeim hætti sem hún óskaði.

Við óskum húsfreyjunni á Bjargi til hamingju með árangurinn - eldhúsi verður snilld.

Annars var þetta nú ekkert sérstakt (HBS, England, haustið 2005.) 

John O'Shea tryggði Man.Utd. sigur á Anfield

Kleinur hríðlækka

Ég varð áþreifanlega var við mikla lækkun á kleinum í dag 1. mars.

Fór í Brauða og Kökugerðina á Akranesi og yngsta barnið sem er að verða 5 ára fékk fría kleinu hjá Alla bakara.

Þeir fóru í sjómann, kleinan var lögð undir, og minn maður vann að sjálfsögðu.

Kannski var þetta bara blöff hjá bakaranum.

Tja ég veit ekki.

Gleymdi að taka með mér strimilinn og kanna það á vefsíðunni neytendasamtakahagsmunasamtökumneytendaneytendastofu.is

Er alveg ferlega slakur í svona verðkönnunum og eftirfylgni. 

Söluskáli KHB lækkaði ekki verð í morgun

1. mars 1989 - ógleymanlegur

Ég held að 1. mars þoli varla að fá viðhengið "matarskattarlækkunardagurinn" ofaná "1. bjórdaginn" -.

Þórir Ólafsson fyrrum skólameistari Fjölbrautaskólans á Akranesi gerði skemmtileg stjórnsýsluleg mistök þegar hann samdi við stjórn nemendafélagsins um tímasetningu á "opnum dögum" vorið 1989.

Það voru dagarnir 1., 2. og 3. mars. 

Mættum lítið á þessa "opnu daga" að mig minnir.

Mjöðurinn var hinsvegar aðalviðfangsefni flestra.

Miðvikudag, fimmtudag, föstudag og síðan kom helgi að mig minnir.

Til hamingju með daginn.  

Stærðin skiptir máli

Kvennalið Hauka er sannarlega stórglæsilegt á forsíðu íþróttablaðs Morgunblaðsins í dag. Fimmdálka mynd á forsíðu og allir í stuði.

Að sjálfsögðu eru kollegar okkar á íþróttadeild Fréttablaðsins með umfjöllun og mynd af Haukaliðinu...

Á ágætu ljósmyndanámskeiði sem Einar Falur stóð að í síðustu viku sagði hann að stærðin skipti máli. Það var nánast það eina sem ég man frá námskeiðinu.

Ég held svei mér þá að hann hafi hitt naglann á höfuðið miðað við liðsmyndina sem birtist í Fréttablaðinu í dag...

Eins og þið sjáið á myndinni hér til hliðar er liðsmyndin af Haukaliðinu í eindálknum neðst til hægri á íþróttasíðunni.