Föstudagsgetraunin

Föstudagsgetraunin.

Hvaða listi er þetta?  Verðlaun, ársmiði í blaðamannastúku Laugardalsvallar.   

    e,s það er greinilegt að verðlaunin hræða þá sem vilja taka þátt. Svarið er sáraeinfalt. Þetta er listi yfir  fjölmiðla í Lettlandi. Ef við erum heppnir þá verða þeir ekkert voðalega margir í Laugardalnum í október þegar Ísland mætir Lettum á Þjóðarleikvanginum. Kannski verðum við bara inni eftir allt saman. 

 

    * The Baltic Times

    * Baltische Rundschau

    * Business & the Baltics

    * Chas

    * Datoru Avize

    * Diena Online

    * Digital Times

    * EN

    * Energetikas Vestnesis

    * Internet digest of Newspaper SM Weekly

    * Kapitala

    * Kurzemes Vards

    * Laba

    * Laikraksts Vakara Ziòas

    * Latgales Laiks

    * Latvian University Bulletin

    * Latvijas Avize

    * Latvietis Latvija

    * Latvijas Vestnesis

    * Lauku Avize

    * Nasha

    * Neatkariga Rita Avize

    * Ogres vestis

    * Plesums

    * Reklama

    * Tovary Optom

    * Universitates Avize

    * Utopija

    * Zemgales Zinas

Áfengi í boði fyrir útvalda - nema í golfinu

Áfengi er ekki aðgengilegt fyrir hinn almenna áhorfanda sem fer á lands - eða deildarleik hér á Íslandi. Samt sem áður er áfengi í boði fyrir útvalinn hóp á landsleikjum í flestum íþróttagreinum. Sem eru þá kallaðir heiðursgestir.

Ég hef ekkert á móti því að þeir geti fengi sér bjór, rautt eða hvítt vín eða hvað sem er í boði í VIPPINU.

Það sem ég undra mig á er að íþróttahreyfingin komist upp með að mismuna fólki með þessum hætti. KSÍ, HSÍ og KKÍ eru öll með sömu reglurnar og hefðirnar.

Það stakk mig að sjá mann sem var á leið inn á Laugardalsvöll s.l. miðvikudag með tvö börn með í för. Hann var stöðvaður og öryggisvörður grandskoðaði í bakpoka hans áður en hann fór inn. "Að hverju ertu að leita," spurði maðurinn. "Áfengi," svaraði öryggisvörðurinn. "Við erum bara með nesti og kakó á brúsa," sagði maðurinn og var hálfhissa á þessu umstangi.

Þetta er í raun ótrúlegt ástand.

Hversvegna er Íslendingum ekki treyst til þess að umgangast bjór og léttvín á íþróttaleikjum?

Þeim er treyst til þess í leikhúsum, á rokktónleikum, en ekki á íþróttaleikjum. Það er alveg ljóst að stór hluti þeirra sem fer á landsleik í fótbolta mætir til leiks í þannig ástandi að það er  "kaupstaðarlykt" af mönnum. Og þar sem aðgengi að bjór er ekkert þá drekka menn ótæpilega áður en þeir fara inn á völlinn. Hafið þið séð "líkin" sem eru fyrir utan Laugardalsvöllinn áður en landsleikir hefjast. Leyndarmálið er nú ekki meira en það að menn sitja í hópum rétt utan við völlinn og drekka bjór. Er það betra en að selja þessa vöru inni á vellinum og hafa ástandið eðlilegra?

ÍSÍ þarf að mínu mati að fara yfir þessi "heiðursgesta" og VIPP-menningu í hreyfingunni. Ég skil ekki afhverju almenningur lætur þetta yfir sig ganga?

Aðeins fáir og útvaldir einstaklingar mega drekka á leikjum en aðrir ekki?

Hvað rugl er það?

Það er aðeins ein íþróttagrein sem sker sig úr á þessu sviði þar sem allir eru jafnir. Golfið. Þar er kaldur á krana, kaldur í dós, kaldur í flösku í flestum ef ekki öllum golfskálum landsins. Hvítt og rautt fyrir þá sem það vilja. Og það er enginn að kvarta yfir því enda enginn ástæða til. Allir helsáttir. Og það sem meira er. Það þurfa allir að borga fyrir þann kalda.  

Skál.

Spontant ákvörðun

Dæmigert "spontant" ákvörðun hjá Íslendingum. Ég hélt að það væri lítið upp úr því að hafa að ræna banka í dag, eru ekki smápeningar uppi við hjá gjaldkerunum í dag miðað við það sem var áður.

Allt rafrænt.

Ég ætla að nota tækifærið og birta mynd sem ég stal af öðru bloggi.

Hlýt að eiga rétt á því þar sem að einhver papparazzi ljósmyndari er farinn að skjóta myndum af stétt íþróttafréttamanna. Líf okkar allra hefur breyst. Maður getur ekki farið í Einarsbúð lengur án þess að vera hundeltur af ljósmyndurum.

Við getum samt sem áður verið alveg vissir um að þessar myndir verða aldrei birtar í dagblöðum á Íslandi. Þau eru einfaldlega ekki nógu stór til þess að birta myndir af mönnum í þessum stærðarflokki.

Gleðin skín úr hverju andliti á þessari mynd sem tekin var í fréttamannaaðstöðunni í Laugardalnum á miðvikudaginn. Græna Moggaúlpan alveg að virka hjá síðuhaldara, Þorsteinn Gunnarsson spakur með derhúfuna en Arnar Björnsson kann þetta enda alinn upp á Húsavík. Slíkir ísbirnir þurfa ekki húfu. 

e.s ég gleymdi að nefna "sílin" sem eru að vaxa í þessari stétt. Hörður fotbolti.net og Maggi aðalmaðurinn á þeirri síðu eru að sjálfsögðu ekki með húfu á landsleik. Það er alveg glatað fyrir menn á þessm aldri og Höddi hefur reyndar ekki verið mikið klæddur á þeim viðburðum sem ég hef verið á að undanförnu. Menn mæta bara í bol í 3 gráður á Akranesi. Sjómaður.  

Tveir Bjarnar í steininum

Klístraður handbolti og faxtæki

Þá er klístraður handbolti farinn í gang.

N1-deildin í kvenna og karlaflokki. Konurnar fóru af stað í kvöld. 

Margir spenntir fyrir handboltanum en við á íþróttadeild Morgunblaðsins þurfum nú að fara að leita aftur að faxtækinu okkar. Ég var á vaktinni í kvöld og þurfti eiginlega að leita og tékka hvort við værum með svona tæki?

HSÍ er eina sérsambandið sem er ekki með úrslit og leikskýrslur í rafrænu formi. Ótrúlegt að staðan sé svona árið 2007. Ég held reyndar að þeir ætli sér að skutla HSÍ inn á 21. öldina fljótlega..... (e.s þeir voru ekki lengi að því. Tvær skýrslur komnar á Excel-skjali. Tíðindi úr Laugardalnum og vel gert HSÍ:)

Topp gaur á Seltjarnarnesinu faxaði samviskusamlega leikskýrsluna úr leik Gróttu og HK í kvöld. Í fjórum eintökum. Alveg pottþétt. Hann hefur kannski ekki kunnað á græjuna enda fáir sem nota faxið í dag.

Ég held samt að hann hafi ekki staðið yfir tækinu og ekki skilið afhverju helv. skýrslan kom alltaf aftur og aftur út úr tækinu í stað þess að fara upp á Mogga. Við fengum allavega fjórar skýrslur en ekkert fax kom úr Fram-heimilinu og Vodafonehöllinni

Fyrir þá sem eru búnir að gleyma þá eru faxtæki svona...

Græn slumma í beinni útsendingu

Ég held að önnur eins slumma hafi ekki verið hrist úr koki áður í beinni útsendingu í sjónvarpi áður.

Ég hélt um tíma að það myndi fækka um einn í Samtökum íþróttafréttamanna um miðjan fyrri hálfleik í leik Vals og KR í Landsbankadeild kvenna í dag.

Hrafnkell Kristjánsson á RÚV átti slummuna en hann virtist vera að kafna og hóstaði eins og stórreykingamaður í nokkrar sekúndur. Hann virtist hafa jafnað sig en byrjaði síðan aftur. Stórkostlegt sjónvarpsefni en sem betur fer slasaðist Hrafnkell ekki illa.

20 millj. reyndu að ná í miða á sama tíma

Ég sá frétt um þetta á Sky í gær. Þar sagði fréttaþulurinn að 18.000 miðar væru í boði. Og kl. 1:30 í nótt voru 20 millj. IP-tölur að reyna að komast inn á sama tíma til þess að kaupa þessa miða. Ég var ekki einn af þeim., hef aldrei kveikt á Zeppelin...en eflaust verða þetta góðír tónleikar. 

Led Zeppelin kemur fram á tónleikum

Ótrúlegt

Þetta er ótrúlegt. Ég er einn af fjölmörgum sem fer þessa leið nánast daglega í og úr vinnu. Aurskriða? í Kollafirði?. Aldrei átti maður von á þessu. 

Hvassviðri hefur verið einkenni Kollafjarðarins en það leynast greinilega hættur allstaðar. Sem betur voru fáir sem slösuðust í rútunni en konurnar ætluðu greinilega ekki að láta neitt stöðva ferð þeirra til útlanda.

Rútur geta verið skemmtilegar en einnig koma upp atvik þar sem bílstjórar missa stjórn á ástandinu. Ég var fyrir mörgum árum í skólaferðalagi með unglinga úr Borgarnesi á leið til Reykjavíkur, og í Hvalfirði var gríðarleg hálka. Skammt frá Ferstiklu var mikið fjör í bílnum en kennaraliðið og þar á meðal ég hafði séð það miklu verra. Ástandið var því þolanlegt  -enn sem komið er. Bílstjórinn var eitthvað trekktur og hann snarnegldi niður á miðjum veginum og rauk sjálfur aftur í bílinn áður en hann stöðvaði. -til þess að lesa krökkunum pistilinn. 

Rútan rann til hliðar á veginum í hálkunni og var í þann veginn að fara útaf þegar hann áttaði sig á mistökunum.

Ástandið í rútunni var eldfimt í kjölfarið og bílstjórinn fékk "hárþurrku" meðferð frá mér þrátt fyrir að aldursmunurinn væri mikill á okkur.

Ég gekk aftur í rútuna og ræddi við unglingana.

Allir spakir og við héldum ferð okkar áfram. Þá sagði einn sprækur Borgnesingur.

"Hei, Elvar, ég veit núna hvar neyðarhemillinn er á rútunni,".

Góður.

Það var skipt um bílstjóra í Reykjavík. Hann óskaði sjálfur eftir inná skiptingu  - líklega meiddur.  

Þjóðvegurinn í Kollafirði ruddur

"Ég ætla sko ekki að fara í Liverpúl í leikskólann,"

Ég vona að við verðum í "Höllinni" eða á grasinu á æfingu í dag pabbi," sagði 5 ára pjakkurinn í gærmorgun en hann sparkar í bolta með 8. fl. líkt og fleiri krakkar í fótboltabænum Akranesi.

"Það er miklu betra en að vera í íþróttahúsinu  - þar get ég ekki tæklað," bætti hann við. Svona er að vera yngstur og eiga fyrirmyndir sem tækla manna alla daga þegar færi gefst. 

Í morgun láku tárin niður kinnar mínar þegar sá stutti var að klæða sig úr Liverpool -búningnum sem hann átti að nota í íþróttatímanum í leikskólanum. Gleðitár altso. 

"Ég ætla sko ekki að fara í Liverpúl í leikskólann," sagði hann. "Nú afhverju," svaraði ég enda góð tíðindi fyrir okkur sem hafa staðið í Tottenham trúboði undanfarin ár með misjöfnum árangri, (33% árangur).

"Það stendur Axel aftan á búningnum. Ég ætla sko ekki að fara í þessum búning. Ég vil fá Ísak aftan á búninginn," sagði Ísak. Ég vissi að tvær barnatennur eru lausar í drengnum en ég vissi ekki að hann kynni að lesa. Það er greinilega tími til kominn að endurskoða þetta vaktaplan á íþróttadeild Morgunblaðsins. Menn eru aldrei heima hjá sér!

Tjáningarfrelsið er dásamlegt

Svona gera menn ekki og miðað við það sem sést á myndbandsupptöku frá þessu atviki á sá stóri von á löngu banni.

Að öðru.

Eins og einhverjir hafa frétt þá hafa félagar í Samtökum Íþróttafréttamanna látið í ljós óánægju með nýja útiaðstöðu fyrir fréttamenn á Laugardalsvelli. Það mál er enn í vinnslu. Eflaust hafa einhverjir verið ósáttir við að félagsmenn SÍ hafa notað bloggsíður til þess að skrifa um ástandið.

Tjáningarfrelsið er samt sem áður dásamlegt. Kannski fæ ég þriggja leikja bann og 100.000 kr. sekt eftir þessa færslu?

Ég ætla að hrósa KSÍ fyrir að hafa gert sitt besta á leiknum í kvöld gegn N-Írum. Gæslan var í lagi, borðin voru þurr og tuskur til staðar fyrir þá sem vildu. Meira að segja boðið upp á regnfatnað fyrir gesti og gangandi. Nokkir pennar frá N-Írlandi fóru glaðir af vellinum í Landsbankarvindjökkum og Errea regnbuxum.

Veðrið var þokkalegt án þess að ég viti hvort KSÍ hafi samið sérstaklega um það. Ég held að það hefði allt orðið vitlaust aftur ef regnið hefði látið á sér kræla líkt og á Spánarleiknum. Flestir N-Íranna voru með tölvur í gangi en íslenska pressan sem var tölvutengd fékk húsaskjól að þessu sinni.

Fjöltengin voru enn laus út um allt.. en það stendur víst til bóta. 

Samt sem áður er staðsetning á þessari aðstöðu með þeim hætti að vatn og vatnsveður á eftir að verða aðalvandamálið.

Ég hef víða setið utandyra á vinnuferðum mínum undanfarin 7 ár. Á Þúsaldarleikvanginn í Cardiff, á AOL-leikvanginn í Hamborg, á Råsunda í Stokkhólmi, á Ullevål í Osló og fleiri staði mætti nefna.

Allir þessir vellir eru með útiaðstöðu fyrir blaðamenn.

En stóri munurinn er að allir vellirnir eru með þessa aðstöðu alveg uppi í rjáfri á stúkunum og litlar líkur eru á því að menn fái vatnsveður á tölvurnar og annað sem þessu fylgir.

Blaðamannaaðstaðan á Laugardalsvelli er mikið neðar en var áður en vellinum var breytt.

Í "denn" sátu þeir sem þurftu að vera úti á Laugardalsvelli alveg uppi við rjáfur og vatn og vatnsveður var aldrei vandamál. Þetta er vandamálið í hnotskurn. Og á þeim tíma var ekki búið að gera alþjóðasamning sem varð til þess að íslenska pressan verður úti á Laugardalsvelli og sú erlenda inni. Þegar gamla stúkan var til þá var þessu öfugt farið, heimamenn inni og erlendir gestir úti. Mér fannst það fín hefð.  

Samt er hundfúlt að mæta í vinnusvæði með tölvu og geta átt von á því að skemma vélina og geta ekki komið fréttum af gangi mála á vefinn. Þarna liggur hundurinn grafinn. Þeir sem áttu von á því að seth myndi hætta að blogga geta gleymt því. Fjörið er rétt að byrja.

Scolari sló leikmann Serbíu í andlitið

Fékk ábendingu um að ég væri klikk

Ég fékk vinsamlega ábendingu frá betri helmingnum að ég væri klikkaður, hver les leyfiskerfi KSÍ í frístundum? Núna er þessu stóra blauta íþróttafréttamannamáli lokið. Það er öllum skítsama úr þessu og veðrið maður, veðrið. Jía. 

Ég held að  maður taki bara DV á þetta í kvöld. En þeir skrifuðu um eitthvað stórmót í handbolta frá Íslandi, fengu ekki að fara út, og blaðamennirnir sem voru lítt sáttir við ákvörðun yfirmanna sinna kvittuðu undir með þessum hætti. "xxx," skrifar úr sófanum í Þverholti.

Kannski verðum við bara allir upp á Hádegismóum í dag, græjum leikinn í gegnum sjónvarpið, og látum það duga. "

Sigurður Elvar Þórólfsson skrifar úr gula sófanum í Hádegismóum við Rauðavatn." Þetta lítur vel út...

"Ég vorkenni ekki íslenskum blaðamönnum að þurfa að sitja úti,"

Íslendingar eru gestrisnir og vilja taka vel á móti þeim sem hingað koma. KSÍ er að sjálfsögðu á þessari línu og þeir fjölmörgu blaðamenn sem hingað koma á landsleikina gegn Spánverjum og N-Írum fá flestir húsaskjól á Laugardalsvelli. Enda mikilvægt að láta gestum líða vel og njóta leiksins við bestu aðstæður. 

Íslenskir íþróttafréttamenn sem skrifa um íþróttir í dagblöð eru sjómenn stéttarinnar. Við stöndum úti á dekki í hvaða veðri sem er á meðan kollegar okkar úr ljósvakastéttinni sitja inni í hlýjunni, tala útlensku og éta vínarbrauð. Við herðumst á þessu og kynnumst íslenskri náttúru. 

Reyndar sat einn reyndur garpur úr ljósvakastéttinni á meðal okkar í frilufts aðstöðunni á Spánarleiknum. Arnar Björnsson. Égheld reyndar að hann hafi verið í upptöku á þættinum Tekinn....menn sitja ekki sjálfviljugir í nýju blaðamannaaðstöðunni í grenjandi rigningu.

En hvað eru menn að væla. Við fáum frítt á leikinn, veitingar eru í boði, kaffi og samlokur, og sætin eru á besta stað á vellinum. Helv. frekja í stétt íþróttafréttamanna að ætlast til þess að fá að sitja inni við vinnu sína.

Svona er þetta í útlöndum og þá er alveg hægt að gera slíkt hið sama á Íslandi. "Ég vorkenni ekki íslenskum blaðamönnum að þurfa að sitja úti," sagði formaður KSÍ í útvarpsþættinum á fotbolti.net í gær. Ég geri því ráð fyrir því að formaðurinn verði með okkur í blaðamannastúkunni í kvöld og komist að því sem allir vissu.. rigningin á Íslandi kemur úr öllum áttum.

Kominn tími á sigur

Partýtjald í blaðamannastúkuna

Stóra blauta íþróttafréttamannamálið hefur vakið heimsathygli...og menn ætla ekki að deyja ráðalausir fyrir morgundaginn. Við ætlum að drösla þessari græju upp í stúkuna og græja málin. Hitablásari verður á staðnum enda nóg af framlengingarsnúrum.

Húkkum tjaldinu í VIPPIÐ að ofanverðu og varamannaskýlin að neðanverðu. Tengjum bjórdæluna í VIPPIÐ., og bjóðum sauðsvörtum almúganum sem var böstaður í hliðinu með einn til tvo kalda upp á LAGER.

Málið er dautt og allir helsáttir.

Leyfiskerfi KSÍ minnist ekki orði á þak, veggi eða gler..

Hér eru nokkur atriði úr 52 síðna doðranti frá KSÍ sem lið í Landsbanka og 1. deild karla þurfa að uppfylla. Leyfiskerfi KSÍ.

Í kafla um aðstöðu fyrir fréttamenn vekur það athygli að það er ekki stafur um að þessi aðstaða eigi að vera  með þaki, veggjum og gleri..

Öll lið í Landsbankadeild karla eru með aðstöðu sem er með þaki, veggjum og gleri. Ekki á Þjóðarleikvanginum...
 

1D C

Aðstaða fjölmiðla á leikvangi staðsetning fréttamannastúku

Fréttamannastúka skal vera til staðar og helst í miðri aðalstúku. (Laugardalsvöllur uppfyllir þetta)

Staðsetning skal vera sem best og aðeins heiðursstúka skal vera betur staðsett. (Staðsetningin er fín, eina vandamálið er að það rignir á okkur sem erum að reyna að vinna þarna).

Þar skal sjá fyrir góðri lýsingu og nauðsynlegum tengingum og gjarnan hita.(Lýsingin er ekki vandamál, blautar rafmagnssnúrur en við værum alveg til í hita)

Auðvelt aðgengi skal vera til og frá annarri aðstöðu fjölmiðlamanna, s.s. að

herbergi fyrir fundi með fréttamönnum. (Laugardalsvöllur uppfyllir þetta)

Viðunandi aðstaða þarf að vera fyrir fjölmiðlafólk (fréttamannastúka og

herbergi fyrir fréttamannafundi).

Nota skal eftirfarandi viðmiðanir:

-Fréttamannastúka skal vera með minnst 10 sætum. (Laugardalsvöllur uppfyllir þetta)

-Sæti skulu vera með borðum sem rúma a.m.k. fartölvu, minnisblokk og síma.

(Laugardalsvöllur uppfyllir þetta en það er spurning um að stækka aðeins borðin til þess að koma fyrir golfregnhlíf, lúffum og handklæði).

-Herbergi fyrir fréttamannafundi skal hafa minnst 12 sæti fyrir fréttamenn.

(Laugardalsvöllur uppfyllir þetta).

 

Þetta bláa er rigning

Þetta bláa á myndinni er rigning.,og þetta fjólubláa er enn meiri rigning. Samkvæmt spá á belgingur.is fyrir síðdegið á miðvikudag.

Það verður hressandi að fá þetta í andlitið í blaðamannaaðstöðunni á næsta landsleik. En hvað um það. Við erum Íslendingar og kvörtum ekki.

Landsleikur Íslands - N-Írlands hefst 18:05...Kannski verður stóra blauta fréttamannamálið enn stærra eftir morgundaginn?

 

Hér til hliðar er mynd af íslenskum íþróttafréttamanni sem er með hlutina á hreinu - og klæðir sig eftir veðri. Spurning dagsins er: Hver er maðurinn?

 

 

Blaðið fær hrós

Blaðið fær hrós fyrir að birta búta úr bloggum íþróttafréttamanna í blaðinu í dag. 

Það verður spennandi að sjá hver niðurstaðan verður eftir fund KSÍ og formanns SÍ (Samtaka Íþróttafréttamanna)  í dag vegna aðstöðuleysis íþróttafréttamanna á Þjóðarleikvanginum.

Fundurinn er eftir hádegi í dag. Það gæti bjargað málunum fyrir horn að líklega verða ekki margir blaða - og fréttamenn sem fylgja landsliðið N-Íra. Spænska pressan var með her af fólki og öll sæti sem voru í skjóli voru upptekin.

En það breytir því ekki að þegar stórlið á borð við Spán koma til landsins þá verður það alltaf íslenska pressan sem þarf að sitja úti í kulda og trekki, rigningu og kannski snjókomu um miðjan október.

Ég held að KSÍ hafi áttað sig á óánægju okkar.

Sjálfsmark hjá FH-ingum

Þessi niðurstaða stjórnar FH kemur ekki á óvart. En það tók sinn tíma fyrir stjórn FH að fara yfir málið. Erfið ákvörðun án efa en ég held að "dómstóll" götunnar verði í liði með Fjölnismönnum. Davíð og Golíat. Risinn sem vaknaði í Hafnarfirði fyrir þremur árum er á góðri leið með að skora sjálfsmark og þessi ákvörðun skaðar ímynd félagsins.

FH-ingar hafa ekki unnið bikarmeistaratitilinn og vilja gera allt til þess að ná tvennunni. Ég er á þeirri skoðun að FH-ingar hefðu átt að leyfa strákunum að spila. FH-ingar eru á annarri skoðun og það ber að virða. Þótt ég sé ekki sammála þeim.

Ég ætla að nefna eitt gott dæmi hvernig svona lánsmannamál hafa verið leyst.

Fernando Morientes fékk að leika með Mónakó í fjórðungsúrslitum Meistaradeildarinnar gegn Real Madrid, en hann var í láni frá spænska stórliðinu. Hann skoraði síðan mark í 4:2 tapleik á útivelli í Madrid og  einnig skoraði hann í 3:1-sigri liðsins gegn Real Madrid á heimavelli.  Spænska stórliðið sat eftir og komst ekki áfram. Stuðningsmenn Real Madrid fögnuðu Morientes þegar hann skoraði á Bernabeu..ungmennafélagsandi þar á ferðinni....

Atli Viðar og Heimir verða ekki með Fjölni í úrslitaleiknum

Tæknileg vandamál

Tæknileg vandamál á þessu bloggi þessa stundina. Síðueiningar hverfa og koma ekki aftur. Hvað er í gangi?

Stóra blauta íþróttafréttamannamálið.........

Stóra blauta íþróttafréttamannamálið vindur upp á sig og núna verður fundað um stóra blauta íþróttafréttamannamálið á morgun. Legg til að fundurinn verði haldinn í blaðamannastúkunni á Laugardalsvelli.....

 

Samtökin krefjast svara frá KSÍ

Samtök íþróttafréttamanna hafa óskað eftir því að fá svör frá KSÍ vegna þeirrar aðsöðu sem boðið er upp á fyrir blaðamenn á Laugardalsvelli. 

KSÍ

Bt. Geirs Þorsteinssonar formanns, Þóris Hákonarsonar framkvæmdastjóra, starfsfólks KSÍ, vallarstjóra og stjórnarmanna KSÍ.

 

Íslenskir íþróttafréttamann hafa ýmislegt látið yfir sig ganga í gegnum tíðina hvað varðar aðstöðu á knattspyrnuleikjum. En nú er mælirinn fullur. Á nýuppgerðum þjóðarleikvanginum var íslenskum íþróttafréttamönnum sýnd þvílík vanvirðing á landsleik Íslands og Spánar í gær að elstu menn í þessu fagi muna ekki eftir öðru eins.

 

Vinnuaðstaða íslenskra íþróttafréttamanna á leiknum var til háborinnar skammar því það rigndi á tölvur og skrifblokkir. Þá var engin gæsla á okkar vinnusvæði. Fólk ráfaði þarna um ölvað og að leik loknum var ekki vinnufriður. Verst af öllu var að enginn hjá KSÍ sem rætt var við á leiknum í gær sýndi vilja til þess að bæta úr málinu eða vera okkur innan handar, sem endurspeglar virðingarleysið fyrir okkar starfi.

 

Undirritaður ásamt öðrum stjórnarmönnum í Samtökum íþróttafréttamanna mætti á fund fyrir einu og hálfu ári hjá þáverandi framkvæmdastjóra KSÍ. Þar var fullyrt að við þyrftum engar áhyggjur að hafa, við hefðum aðstöðu innandyra á landsleikjum í framtíðinni. Þessi loforð voru svikin á Laugardalsvelli í gær.

 

Samtök íþróttafréttamanna hafa einnig kvartað yfir aðstöðuleysi við KSÍ við önnur tækifæri en því miður hefur því oftar en ekki verið svarað með tómlæti eða útúrsnúningum fram að þessu.

 

Samtök íþróttafréttamanna krefjast þess að KSÍ biðji félagsmenn okkar afsökunar á þeirri aðstöðu sem boðið var upp á í gær og að KSÍ bæti snarlega úr vinnuaðstöðu fyrir íþróttafréttamenn á landsleikjum í framtíðinni. Að auki viljum við fá svar við eftirfarandi spurningum:

 

1. Hvers vegna var okkur boðið upp á þessa óásættanlegu aðstöðu?
2. Hvers vegna voru starfsmenn KSÍ víðs fjarri meðan á leik stóð?
3. Hvers vegna var engin gæsla þarna í kring?
4. Er það ásetningur KSÍ að losna við íslenska íþróttafréttamenn af landsleikjum á Laugardalsvelli?
5. Hvers konar aðstöðu verður okkur boðið upp á þegar Ísland mætir Norður-Írlandi á Laugardalsvelli á miðvikudaginn?

 

Svar óskast í síðasta lagi mánudaginn 10. september nk. kl. 14.

F.h. Samtaka íþróttafréttamanna

Þorsteinn Gunnarsson, formaður

Úti á dekki á frystitogara

Spears yrði varla mikið eldri svona klædd í blaðamannaaðstöðunni á Laugardalsvelli..Miðað vð stórgóða spá á belgingur.is fyrir landsleikinn gegn N-Írum á miðvikudaginn er ljóst að það verður blautt í "frilufts" aðstöðu blaðamanna á Þjóðarleikvanginum. 

  

 

Íslenskir blaðamenn hafa nú lagt fartölvunum til hliðar og fengið nýjar og öflugri græjur sem hannaðar voru af Marel - en þessar tölvur eru vatnsheldar og mikið notaðar í frystihúsum og úti á dekki á frystitogurum. 

 

 

 

 

 

 

 

 

 

 

 

 

Það er heitt í kolunum í stétt blaðamanna og menn eru alls ekki sáttir við þá aðstöðu sem boðið er upp á eftir rándýrar endurbætur á Laugardalsvelli. Bolvíska Stálið er í essinu sínu, Henry Birgir er einnig hvass, Hafliði Breiðfjörð á Fotbolti.net er einnig með færslu og Tom á sama miðli er einnig með áhyggjur. Síðuhaldari hefur ekki legið á skoðunum sínum. 

 

Britney Spears vakti litla lukku á MTV-verðlaununum