Pressa á íþróttafréttamönnum

Hvalfjarðargöng verða lokuð vegna viðhaldsframkvæmda aðfararnótt þriðjudagsins 22. apríl og aðfararnótt miðvikudagsins 23. apríl. Lokunin varir frá miðnætti til klukkan sex að morgni. Vegfarendur þurfa því að aka um Hvalfjörð þessar tvær nætur.

Leikur Snæfells og Keflavíkur hefst kl. 20.00 - líklega þríframlengdur...leikslok áætluð 22:15.. Ég er eiginlega með það á hreinu að einhverjir snillingar úr stéttinni fái sér bíltúr í Hvalfirði rétt eftir miðnætti í kvöld. 

Borgarneslögreglan í samvinnu við sérsveit Ríkislögreglustjóra mun vera með öflugt eftirlit með ökurhraða á Mýrunum og undir Hafnarfjalli seint í kvöld.... 

Spáin er þessi

Ég klikkaði á því að spá fyrir um úrslitarimmuna áður en leikurinn í dag hófst.

Gleymdi mér yfir Middlesbrough - Bolton, Wigan - Tottenham.

Eða þannig. Geisp......

Hjörtur Júlíus Hjartarson á RÚV vakti mig í morgun kl. 11:30 og það er víst til á teipi að ég spáði Keflavík sigri í dag.

Það gekk eftir en leikurinn var spennandi. Jonni Mæju (Jón Ólafur Jónsson) var næstum því hetja dagsins. Síðasta skotið fór á hringinn en ekki í gegnum hann.......

Spáin er þessi:  

Snæfell vinnur oddaleikinn á útivelli..

3:2 fyrir Snæfell.

 Ég spái því einnig að hraðamyndavélin við Fiskilæk í Leirársveit muni smella nokkrum myndum af íþróttafréttamönnum á næstunni..

Keflavík sigraði í fyrsta leiknum

Henry Birgir er ...

lágvaxnari en margur heldur. Ég hef nokkrum sinnum farið í þáttinn Utan vallar í vetur þar sem að Henry er með ársmiða.

Sjónvarpið blekkir þegar kemur að því að meta hæð manna og í 16:9 formattinu eru flestir litlir og sumir virðast jafnvel vera feitir.

Og það er einnig ótrúlegt hverni ljósin í upptökusalnum fara illa með lúkkið á hárinu á viðmælendum.

Það virðist jafnvel vera um skalla að ræða. Ótrúlegt þetta sjónvarp maður.

Þetta myndband er líka ótrúlegt. Er þetta sett á svið?

 

Rottuborgari!

Snillingarnir á baggalutur.is eru með þetta innslag í dag.

Ég velti því fyrir mér hvort þetta gæti ekki átt við grísí Kebab stað á götuhorni í Osló?

Áhorfendatölur í hand -og körfubolta

Umræðan um stöðu handboltans er mikil þessa dagana. Sérstaklega þar sem að úrslitakeppnin í körfunni á sviðið og þar baða menn sig í sviðsljósinu. Í Keflavík í kvöld var stappfullt út úr dyrum, líkt og í hinum leikjunum í undanúrslitunum. 

Lokaumferðir N1-deildar karla virðast varla vekja áhuga leikmanna, hvað þá áhorfenda. Geisp.

Það er gott að handboltahreyfingin taki púlsinn á stöðu íþróttarinnar. Á vefnum handbolti.is eru m.a. Hlynur Sigmarsson, Harpa Melsted og Hjálmar Vilhjálmsson að lýsa skoðunum sínum á stöðunni í dag. Það er margt sem hefur farið úrskeiðis hjá handboltahreyfingunni á undanförnum árum og við tökum þær pælingar í öðrum pistli síðar.

Hjálmar bendir á þá staðreynd að engar tölur um áhorfendasókn liggi fyrir frá undanförnum árum og áratugum. Íslenskir prentmiðlar hafa í gegnum tíðina birt mjög óáreiðanlegar tölur um fjölda áhorfenda á handbolta - og körfuboltaleikjum.

Ég hef tekið sjálfur þátt í því að slumpa á þetta - og stundum hefur maður ekki slumpað. Bara talið þær fáu hræður sem eru á staðnum. Og þá á ég ekki við starfsmenn og leikmenn.

Það er gott að Hjálmar er búinn að fatta þetta að allar samanburðartölur eru mikilvægar til þess að setja sér markmið og gera betur en í fyrra. KSÍ hefur á undanförnum árum hamrað á 100.000 áhorfendatölunni. Það tókst og núna setja þeir sér ný markmið.

Þessa grein skrifaði ég í Moggann 18. desember árið 2002. Það hefur lítið breyst frá þeim tíma. 

Slumpur og slatti"

"ÉG er ánægður með hve margir hafa mætt á leikina í efstu deild karla það sem af er vetri. Við sjáum það á áhorfendatölunum í dagblöðunum að það er veruleg aukning frá því sem var á síðustu leiktíð," sagði maður við mig á dögunum, sem tengist körfuknattleikshreyfingunni á Íslandi. "Já, er það," svaraði ég stuttur í spuna enda hefur undirritaður starfað við að skrifa um íþróttir í tæp þrjú ár, án þess að upplifa það að forsvarsmenn íþróttafélaga gefi upp með formlegum hætti hve margir áhorfendur hafa mætt á leiki í handknattleik og körfuknattleik

Vísindin hvað þessa hluti varðar eru hvorki stórkostleg né ábyggileg og eru í sama anda og meistarakokkar í sjónvarpi nota í gríða og erg. "Slumpum" ögn af rauðvíni í sósuna og "slatta" af rjóma.

Það eru aðeins tveir fjölmiðlar sem gefa upp áhorfendatölur í umfjöllun sinni um kappleiki, Morgunblaðið og DV. "Hvað eigum við að giska á að það séu margir mættir í kofann," er spurningin sem blaðamennirnir velta fyrir sér stutta stund og síðan er samið um að "slumpa" á sanngjarna tölu. Ég játa á mig glæpinn en ef blaðamenn myndu ekki "slumpa" á einhverja tölu kæmu engar upplýsingar fram um þennan þátt kappleiksins.

Öðru máli gegnir um knattspyrnuna hér á landi í efstu deild karla. Þar á bæ er mönnum annt um áhorfendatölurnar. Haldið er utan um upplýsingarnar ár frá ári og hægt er að gera samanburð. Eftir hvern leik í efstu deild karla er hægt að ganga að þessum upplýsingum vísum og þar er gefin upp nákvæm tala. Hvert einasta höfuð er talið með, en ekki er gerður greinarmunur á stóru eða smáu höfði!

Það er tímabært að forsvarsmenn íþróttafélaga í hand- og körfuknattleik gefi þessum þætti meiri gaum, að talið verði rétt á íþróttakappleiki, því þær aðferðir sem notaðar eru í dag eru aðeins tal tveggja manna sem koma sér saman um "rétta" tölu.

Að vísu hefur undirritaður farið á kappleiki í báðum greinunum þar sem hann gat auðveldlega talið "alla" þá sem mættir voru á leikinn.

Á einum leik um sl. helgi gerðist það rétt fyrir leikinn, er einn áhorfandi gekk í salinn, að það glumdi um tómt húsið er strákur einn sagði upphátt: "Þá eru komnir tuttugu og fjórir."

Oftar en ekki þarf ekki telja fleiri en 50 áhorfendur á þessum leikjum sem um er að ræða. Að mínu mati hefur leikjum fjölgað þar sem færri en 100 áhorfendur eru á leik og er sú þróun umhugsunarefni fyrir handknattleiks- og körfuknattleikssambandið, en það er önnur saga.

ÍR í softball í leik 3 og 4

Spáin mín í undanúrslitum Iceland Express deildarinnar stóðs ef litið er á tölurnar, 3:2 og 3:1, en ég gaf ÍR ingum sénsinn á að sanna sig gegn Keflavík. Þar hafði ég rangt fyrir mér. Ég ætti kannski að taka að mér að sjá um hækkun stýrivaxta á Íslandi?

Maður verður seint ríkur á því að tippa á Lengjunni og í raun er ég arfaslakur spámaður.

Keflavík sýndi hvað býr í liðinu í þremur leikjum í röð. Jón N. og Sigurður Ingimundarson voru spakir eftir 2. tapleik liðsins í Seljaskóla þegar ég ræddi við þá fyrir Moggann. Þeir sögu einfaldlega að Keflavík hefði oft unnið þrjá leiki í röð. Ekkert vandamál. Og þeir stóðu við stóru orðin. ÍR var einfaldleg of mjúkt (soft) í 3. og 4. leiknum.. en skemmtilegt að fá ÍR inn í keppnina sem "spútnik" liðið. Gott fyrir körfuna að fá nýtt lið sem á framtíðina fyrir sér og ég vona að kjarni liðsins verði áfram í þessu liði. Eiríkur Önundarson hefur eflaust lokið ferlinum í Sláturhúsinu í kvöld. Frábær gaur þar á ferðinni.

Sem sagt ég blúbbaði á Kef - ÍR, þar sem ég spáði ÍR sigri í oddaleik, 3:2.

Ég grísaði á rétt úrslit í rimmu Snæfells og Grindavíkur, 3:1.

 Til lukku Keflavík og Snæfell. Það verður án efa skemmtilegt að fylgja þeirri rimmu eftir.   

Spenna hjá sportpressunni í Hólminum

Það var mikil spenna í loftinu í Stykkishólmi í gær. Besti körfuboltaleikur síðari ára fór þar fram. Og það var gaman að fylgjast með íþróttafréttamönnum á lokakaflanum og eftir leikinn.

Svitadroparnir runnu niður enni og kinnar.

Takkarnir á lyklaborðinu fengu að kenna á því. Stöffið á leiðinni og dedlænið löngu liðið. Það var ekki bara leikurinn sem setti spennustigið í hæstu hæðir í Hólminum.

Það var annað sem var meira spennandi.

Hvalfjarðagöngin áttu að loka á miðnætti og rétt rúmlega 90 mínútur til stefnu hjá gaurunum úr Sódómu. Eflaust hefur „pinninn“ verið kitlaður á Mýrunum og undir Hafnarfjalli...

Sumir voru ekkert stressaðir. Spakir og löngu búið að loka „rörinu“ þegar seth renndi sér inn í heimabæinn. Enda gott að búa á Akranesi á slíkum stundum.

Ég ímynda mér að það hafi verið ljúft fyrir sportpressuna að renna í gegnum Hvalfjörðin í tunglskininu í nótt. Ferstikla lokuð, Olíustöðin lokuð og Botnskáli farinn....og bara hægt að ná endurfluttum þætti með Valdísi Gunnars á Bylgjunni.. úff..

Eymskip?

Eymskip - Landflutningar.....

já, þessi íslenska getur stundum verið skondin.

Þessa styrktarlínu sá ég í leikskrá hjá körfuknattleiksliði af Vesturlandi á dögunum.

Hefur eflaust vakið meiri athygli fyrir vikið eða er það vykið?

Ís eða Ýs?, Ísak eða Ýsak?  

Suðurnesjaliðin segja söguna

Úrslitkeppnin í körfuknattleik fór fyrst fram árið 1984 þar sem Njarðvík lagði Val, 2:0, í úrslitum. Sú staða gæti komið upp í fyrsta sinn í sögu úrslitakeppninnar að ekkert lið frá Suðurnesjum er í úrslitum. Njarðvík, Grindavík eða Keflavík hafa fram til þessa ekki látið sig vanta í úrslitarimmurnar. 

Hér sagan eins og hún er sögð á kki.is 

1984 Njarðvík 2-0 Valur {61-59, 92-91}
1985 Njarðvík 2-1 Haukar {80-87, 76-75 (68-68), 67-61}
1986 Njarðvík 2-0 Haukar {94-53, 88-86}
1987 Njarðvík 2-0 Valur {84-71, 80-71}
1988 Njarðvík 1-2 Haukar {78-58, 74-80, 91-92 (66-66, 79-79)}
1989 Keflavík 2-1 KR {77-74, 85-92, 89-72}
1990 KR 3-0 Keflavík {81-72, 75-71, 80-73}
1991 Njarðvík 3-2 Keflavík {96-59, 73-75, 78-82, 91-81, 84-75}
1992 Keflavík 3-2 Valur {106-84, 91-104, 67-95, 78-56, 77-68}
1993 Keflavík 3-0 Haukar {103-67, 91-71, 108-89}
1994 Grindavík 2-3 Njarðvík {110-107(98-98), 82-96, 90-67, 65-93, 67-68}
1995 Njarðvík 4-2 Grindavík {92-81, 92-112, 107-97, 79-75, 97-104, 93-86 (78-78)}
1996 Grindavík 4-2 Keflavík {66-75, 86-54, 68-67, 86-70, 72-82, 96-73}
1997 Keflavík 3-0 Grindavík {107-91, 100-97, 106-92}
1998 KR 0-3 Njarðvík {75-88, 56-72, 94-106}
1999 Keflavík 3-2 Njarðvík {79-89, 98-90 (87-87), 108-90, 72-91, 88-82}
2000 Grindavík 1-3 KR {67-64, 55-83, 78-89, 63-83}
2001 Njarðvík 3-1 Tindastóll {89-65, 100-79, 93-96, 96-71}
2002 Keflavík 0-3 Njarðvík {68-89, 88-96, 93-102}
2003 Grindavík 0-3 Keflavík {94-103, 102-113, 97-102}
2004 Snæfell 1-3 Keflavík {80-76, 98-104, 65-79, 67-87}
2005 Keflavík 3-1 Snæfell {90-75, 93-97, 86-83, 98-88}
2006 Njarðvík 3-1 Skallagrímur {89-70, 77-87, 107-76, 81-60}
2007 Njarðvík 1-3 KR {99-78, 76-82, 92-96, 81-83 (73-73)}
2008

ÍR toppar á réttum tíma

Það fór nú lítið fyrir upplýsingaöldinni í "Hellinum" í gær í öðrum leik ÍR og Keflavíkur í undanúrslitum Iceland Express deildarinnar.

Netsambandið í tómu tjóni og allt fór úr skorðum hjá þeim fjölmiðlum sem ætluðu að fjalla um leikinn í "beinni".

Spurning um að taka hrósið til baka. 

ÍR liðið er að toppa á réttum tíma og það kæmi mér ekkert á óvart ef liðið tæki Keflavík 3:0. 

Keflvíkingar voru hrikalega slappir í öðrum leiknum. Flatir eins og gamall bjór!

Spáin mín er í uppnámi þar sem ég spáði ÍR 3:2-sigri.  Í kvöld er það Snæfell - Grindavík. Ætla að bregða mér í Hólminn 

Það er langt síðan að græni dúkurinn var lagður á gólfið í Seljaskólanum og maður vorkennir ÍR að þurfa að æfa á þessum "viðbjóði" alla daga.

Hef reynsluna úr Borgarnesi og Akranesi. Þessi grænu gólf eru eins og steinsteypa og fara ekki beint vel með hné og ökkla.

Mig minnir einnig að allir hafi troðið í upphitun í Seljaskólanum á sínum tíma, líka Jón Þór Þórðarson. Ég lýg því. Brynjar Sigurðsson (Binni) náði aldrei að troða og hann gerir það ekki úr þessu þrátt fyrir fitnessútlit á gamalsaldri. Meira að segja Jón Gísli náði að troða í Seljaskólanum.

Sú saga gengur enn í dag að körfurnar í Seljaskóla séu í 2.95 m hæð en ekki 3.05 m. Spurning um að einhver nenni að mæla þetta...sagan er allavega góð.

 

"fersk" ársgömul frétt á visir.is

Ég stóðst ekki mátið.

Þessi texti er úr frétt sem birt var á visi.is í gær.

Sænska úrvalsdeildin hófst fyrir viku síðan þar sem DIF sigraði Norrköping á útivelli, en það sem er skemmtilegast við fréttina er að Brommapojkarna voru í sænsku úrvalsdeildinni Í FYRRA. Þeir féllu s.l. vor og þessi leikur sem skrifað er um fór fram 6. apríl 2007.

"Þú sást það fyrst á visir.is"

Vísir, 05. apr. 2008 16:24

Tap hjá Djurgaarden í fyrsta leik

Lærisveinar Sigurðar Jónssonar í Djurgaarden, sem eiga titil að verja, biðu lægri hlut fyrir Brommapojkarna, 1-0, í fyrstu umferð sænsku úrvalsdeildarinnar í fótbolta í dag. Sölvi Geir Ottesen sat allan tímann á varamannabekk Djurgaarden.

Ragnar Sigurðsson og Hjálmar Jónsson spiluðu báðir allan leikinn fyrir Gautaborg sem gerði jafntefli, 1-1, gegn Trelleborg á útivelli.

 

Snæfell og ÍR í úrslit?

Ég tek það fram að ég vaknaði EKKI með Valdísi Gunnarsdóttur og Valgerði Sverrisdóttur í morgun eins og þeir á Bylgjunni hafa hvatt mig til þess að gera undanfarna daga. Væri það ekki magnað?

Undanúrslitin í körfunni byrja í kvöld og ég verð víst að spá.

Fékk meldingu frá Danmörku þess efnis að beðið væri eftir þessu bulli.  Hér kemur það.

Keflavík (1.) - ÍR (7.) Ég skýt á að þessi viðureign fari 3:2 fyrir ÍR. Félagið hefur ekki orðið meistari frá árinu 1977 að mig minnir. Það er eitthvað í gangi hjá ÍR sem er erfitt að útskýra. Þeir pökkuðu KR sannfærandi saman í oddaleik á útivelli og þar sem Nate Brown kanna að stjórna hraðanum þá á ÍR möguleika. Þeir vinna oddaleikinn í Keflavík og tryggja sér sæti í úrslitum gegn....

Grindavík (3.) - Snæfell (5.) Hólmarar vinna þetta 3:1. Sorrý Grindavík. Það er bara eitthvað í spilunum sem segir mér að Justin Shouse eigi eftir að fara á kostum ásamt íslenska þríeykinu (Hlynur, Sigurður og Magni). Þeir spila góða vörn og skora mikið undir körfunni í bland við þriggja stiga körfurnar. Er það ekki eitruð uppskrift.  

 

Aðeins of mikið af vill

Stundum eru menn að flýta sér í blaðamennskunni. Félagar mínir á Mogganum hafa kannski ekkert velt þessu fyrir sér en á fólksíðunum í dag eru fjórar fréttir sem eru nánast með sömu fyrirsögnina. Skemmtilegt móment.

 

 

Ekki kjaftur í húsinu

Ég var að horfa á leik Vals og Stjörnunnar í N1 deild karla á RÚV rétt í þessu. Hvar eru áhorfendurnir? Ég lagði mig fram við að finna einn áhorfanda en ég fann hann ekki. Gaman að vera leikmaður í slíku umhverfi! Kannski hafa nokkrir tugir setið þar sem myndavélarnar náðu ekki. Og ég er 100% viss um að áhorfendabekkjunum gegnt upptökuvélum RÚV var lokað til þess að koma í veg fyrir að það myndi sjást hve fáir voru á leiknum.

Á meðan er úrslitakeppnin í körfu í hæstu hæðum og þar láta áhorfendur sig ekki vanta.  Hafrún Kristjánsdóttir skrifar á sínu bloggi um keppnishaldið í handboltanum og þar hvetur hún til þess að úrslitakeppnin verði tekin upp aftur.

Hafrún segir að líklega verði áhorfendamet vetrarins í Vodafone höll Valsmanna 2. leikur Vals og FSu í úrslitum 1. deildar í körfubolta.

Það er umhugsunarefni ef litið er á þá staðreynd að Valur var í Meistaradeild Evrópu í handbolta. 

Hreggviður stóð við stóru orðin

ÍR er heitasta liðið í Iceland Express deildinni í körfubolta þessa stundina. Þeir tóku Íslandsmeistarana í nefið í kvöld, man ekki lokatölurnar, enda skiptir það engu máli. Spáin mín stóðst prófið en ég ætla ekki að spá í undanúrslitin fyrr en nær dregur að þau hefjist.

Keflavík vinnur Þór 2:1 (Keflavík vann 2:0).

Grindavík vinnur Skallagrím 2:0 (Grindavík vann 2:1).

ÍR vinnur KR 2:0 (ÍR vann 2:1).

Snæfell vinnur Njarðvík 2:0 (Snæfell vann 2:0).

Keflavík leikur gegn ÍR og Grindavík er með heimavallaréttinn gegn Snæfell.  

Mér fannst gaman að þessu drasltali sem Hreggviður Magnússon úr ÍR og Fannar Ólafsson úr KR voru í á milli leikja og eftir leiki. Menn verða að standa við stóru orðin og það gerði Hreggviður. KR-ingar voru þungir og einhæfir í sóknarleiknum. Benni þjálfari tók ábyrgðina á sínar herðar í leikslok og kenndi engum um nema sjálfum sér. Fagmaður þar á ferð.  ÍR gæti allt eins farið alla leið og Jón Arnar þjálfari ÍR er greinilega að ýta á réttu takkana á þessu liði. Nate Brown er frábær leikmaður en liðsheildin er sterkasta vopn ÍR.

Bendtner flækjufótur

Það var víst einhver leikur í kvöld í Meistaradeildinni þar sem að tvö ensk lið áttust við í London.

Sá ekki leikinn en í 10 fréttum RÚV sá ég bút úr leiknum og eftir þá sjón er ekki spurning um að þessi danski leikmaður er í miklu uppáhaldi hjá stuðningsmönnum Arsenal.

Annars er þessi Meistaradeild ekkert í samanburði við Carling bikarkeppnina, deildabikarinn. Það er alvörumót.

Borgaði Kárahnjúkavirkjun EINN

Það var maður sem ég þekki sem fékk vægt áfall þegar hann ýtti á villuprófunhnappinn á skattframtalinu á dögunum.

Það var allt í góðu með fráganginn og engar sjáanlegar villur en þegar ýtt var á flipann fyrir BRÁÐABIRGÐAÚTREIKNING fór blóðþrýstingurinn í hæstu hæðir hjá viðkomandi aðila.

"Þegar ég sá að ég ætti að bara að greiða rúmlega 300.000 kr. á mánuði í ágúst, september, október, nóvember og desember leið eins ég ætti að borga Kárahnjúkavirkjun EINN. " sagði sá sem um ræðir við seth.blog.is í óformlegu spjalli. 

Blóðþrýstingurinn hjá viðkomandi er í jafnvægi þessa stundina eftir að hafa rætt við skattayfirvöld.

Þarna var um tæknileg mistök að ræða.

Gott aprílgabb hjá 24Stundum

Er ekki örugglega 1. apríl í dag?

Spáin mín er ekki í uppnámi

Spádómar mínir í átta liða úrslitum úrvalsdeildar karla eru ekki 100%, en tvö af liðunum sem ég spáði áfram eru komin áfram. Keflavík og Snæfell. Ég held að Grindavík sigri á heimavelli gegn Skallagrím. Það er erfiðara að eiga við leik ÍR og KR. Ég held að ÍR hafi ekki fengið betra tækifæri en í gær og fyrst þeir nýttu það ekki verður erfitt að sækja sigur í Vesturbæinn. 

Spáin mín var þessi: 

Keflavík vinnur Þór 2:1 (Keflavík vann 2:0).

Grindavík vinnur Skallagrím 2:0 (Staðan er 1:1).

ÍR vinnur KR 2:0 (Staðan er 1:1).

Snæfell vinnur Njarðvík 2:0 (Snæfell vann 2:0).

 

Snæfell verður meistari!

Hef ákveðið að blogga aðeins þegar sólin skín....kannski er allur vindur úr seth? Hver veit.

Úrslitakeppnin í Iceland Express deild karla er í fullum gangi. 

Óvænt úrslit hér og þar.

Ég hef nú aldrei verið þekktur fyrir að vera góður spámaður en ég tippa á að Snæfell verði Íslandsmeistari í ár.

Keflavík vinnur Þór 2:1

Grindavík vinnur Skallagrím 2:0

ÍR vinnur KR 2:0

Snæfell vinnur Njarðvík 2:0

------------------ 

Í undanúrslitum mætast þá 

Keflavík  - ÍR

Grindavík - Snæfell 

-------------